"Venerabilibus ac religiosis jn Christo patribus et fratribus, domino Andree(1) preposito, totique conuentui monasterij Plagensis, ordinis Premonstratensis, dyocesis Pathauiensis. Nos frater Thomas(2) abbas, Leonhardus(3) prior, totusque conuentus monasterij Altouadensis, ordinis Cisterciensis, Pragensis dyocesis. Cum sincere karitatis affectu salutem in Domino perhenniter adipisci. Quia mediante caritate, que vinculum perfeccionis ab apostolo predicatur, membra singula in corpore sancte matris ecclesie sibi invicem coniunguntur et Christo suo capiti ad percipiendum per ipsum et jn jpso graciarum specialium influenciam vniuntur, tanto liberius atque libencius sinum caritatis jn ampliande confraternitatis(4) consorcium dilatamus, quanto ad participacionem fructus huiusmodi feruencius anhelamus. Vnde vestrarum caritatum affectu et religiositate moti, matura deliberacione prehabita plene confraternitatis bonorum, scilicet omnium consorcium et communionem jn missis, oracionibus, elemosinis, abstinencijs et vigilijs ac alijs virtutum exercicijs, que diuina clemencia per presentes nos et successores nostros jn dicto monasterio Altouadensi dignabitur operari vobis ac successoribus vestris fraternitatem concedimus et presencium tenore roboramus. Adicientes, quod cum obitus vnius vel plurium predicti monasterij vestri professi vel professorum nobis nuncciatus [!] fuerit, vigilias et missam defunctorum iuxta consuetudinem nostri monasterij persoluemus, sed et singuli sacerdotes missas legentes singulas missas, clerici vero missas non legentes officium defunctorum totum, vesperas scilicet, vigilias nouem leccionum cum laudibus, conuersi quoque centum Pater noster cum totidem Aue maria jn remedium animarum eorundem dicent. Jn quorum omnium testimonium et robur hanc paginam sigillis nostris munitam prefatis confratribus nostris tradere decreuimus. Datum anno Domini millesimo quadringentesimo sexagesimo sexto, sabbato ante dominicam vocem jocunditatis(5)."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 413 (S 295), S. 452-453