"Wir Vlrich(1), von Gottes genaden bischoue zw Passaw, römischer canzler: Bekhennen alls vnnser lieb gethrew Caspar Herleinsperger(2) die mahnschafft auf 14 stuckhen äckhern vnd wismadt zw Griespach(3) am hohen marckht vnd ain holltz zusambt ainem wismadt, genant die Zell, alles in Griespacher pfarr vnd in vnnserm lanndtgericht der abbthey. Auf Steffan Kherschperger(4) vnd Veith Herleinsperger(5) den hoff zw Hofhaimb, genant jm obern Prüel, in Veltkhircher pfarr vnd obern Walseer gricht gelegen. Jtem vnd Wolfgang Pruckhner(6), auch Pongraz Frey(7) alls gerhaben eines khindts, genant die Fronsteterin(8), ein guett zw Aiglstorff(9) vnd ain guett zw Wollersdorff(10), vnnser vnd vnnsers stifft lehenschafft vnns mit jren offnen brieffen aufgesandt vnd mit fleiß gebetten haben, die vnnserm lieben gethreuen Vlrichen Herleinsperger(11), vnnserm pfleger zw Tanberg ze leihen, wann sie jm die (NB 1) zw khauffen geben, sonndern Veith Herleinsperger sich vmb den hoff zw Hofhaimb, darumb er gegen jm in jrrung gewesen ist, mit jm veraint hietten. Solch jhr, auch des bemellten Vlrichen Herleinsperger fleissig bette wir angesehen vnd jm die obgemellten, darzue auch die stuckh vnd güetter hernach beschriben, die von weillendt Denckhardten Herleinsperger(12) seinem brueder an jn alls (NB 2) den eltern khumben sein, verlihen haben, leihen jm vnd seinen erben die auch wissentlich in crafft diß brieffs, was wir jm daran zw recht leihen sollen vnd mügen. Also, das sie die nun führan jn lehens weiß jnhaben, nützen vnd nüessen sollen vnd mügen, alls lehens, lanndts vnd vnnsers stiffts an der lehenschafft vnuergriffenlich, ohngeuerdt. Vnd seindt die anndern stuckh vnd güetter also genant (NB 3): Von erst zwai güetter zw Reuth(13), ain guett zw Vierling(14) in Sarleinspeckher pfarr. Jtem zway thaill zehendts auf ainem guett zw Hartmanstorff(15), vnd siben güetter zw Fronaw(16), auf siben güetter zw Mairhoff(17) in Wegschaider pfarr gelegen, vnd gehörendt zw der cappeln zw Rorbach(18). Mit vhrkhundt des brieffs, geben zw Passaw, am mitwochen nach St: Thomans tag, nach Christi vnnsers herrn gebuertt vierzehen hundert vnd darnach im sibenvndsechzigisten jahr." ||
||
[Randbemerkungen des Abschreibers:]||
||
NB 1: "Alhier findt sich der vndterschiedt, wie weit das claßl [?] gehet, nemblichen allain auf die güetter vnd zehent zw endt ordentlich von den anndern separirter sein."||
||
NB 2: "Vlrich Herleinsperger selbst aufgesendet vnd auf jme alls eltisten gefallen sein." ||
||
NB 3: "Id est die stifftgülten."||
||
[Postskript:] "Collat: gegen dem original vnd erfindt sich gleiches jnhallts. Actum Linz ||
den 19. decembris anno 1625. Georg Müllner(19), landtschreiber."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 702, S. 763-764