"Vdalricus(1) Dei gracia episcopus Patauiensis. Solennis libenter annuere pijs supplicum votis, per que Deo propicio diuini cultus augmentum procuratur. Constitutus jtaque in nostri presencia honorabilis deuotus in Christo dilectus frater Andreas, prepositus monasterij ad Plagam, ordinis Premonstratensis, nostre diocesis, nobis exponere curauit, quomodo in confinibus eiusdem sui monasterij vigore cuiusdam consuetudinis diu introducte, collectura linj seu lentis(2) pro luminaribus ipsius monasterij a christifidelibus tribuatur. Preterea nobis humiliter supplicauit, quatenus collecturam huiusmodi admittere, eamque nostra auctoritate ordinaria confirmare et approbare dignaremur. Nos itaque considerantes, peticionem ipsam esse iustam et racioni consonam, jpsum prepositum aut alium, quem ex confratribus sui monasterij ad hoc duxerit deputandum, ad collectionem huiusmodi linj seu lentis pro luminaribus prefati monasterij graciose admisimus et admittimus, jpsamque consuetudinem hucusque introductam confirmauimus(3) et ex certa nostra sciencia confirmamus per presentes. Vt autem christifideles ad huiusmodi caritatis opera amplius incitemus, omnibus vere penitentibus confessis et contritis qui collecturam pro dicto monasterio Dei intuitu impartirj curauerint de omnipotentis Dei misericorida et beatorum Petri et Pauli apostolorum eius auctoritate confisi quadraginta dies jndulgenciarum de jniunctis eis penitencijs misericorditer in Domino relaxamus. Harum quibus sigillum nostrum appensum est testimonio litterarum. Datum Patauie, vigesima quarta mensis decembris, anno Domini millesimo quadringentesimo sexagesimo septimo."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 422 (S 302), S. 465-466