"Wir Vlrich(1), von Gottes genaden bischoue zw Passaw, römischer cannzler: Bekhennen, das für vnns kham vnnser lieber gethreuer Vlrich Herleinsperger(2), vnnser pfleger zw Tanberg, vnd bathe vnns diemüetiglich, das wir jme das guett zw Ezleinsreith(3) vnnser vnd vnnsers stiffts lehenschafft zw seiner gerechtigkhait genedigclich geruchten zuuerleihen, wann das sein erb were. Solch sein fleissig bette wir angesehen vnd jm dasselb guett zw Ezleinsreith zw seiner gerechtigkhait also verlihen haben. Leihen jm vnd sein erben das auch wissentlich in crafft diß brieffs, was wir jm daran zw recht leihen sollen und mügen. Das auf solch sein gerechtigkhait, also in lehens weis jnzuhaben, ze nüzen vnd zu nüessen, alls lehens-, lanndts- vnd vnnsers stiffts recht ist, doch vnns vnd demselben vnnserm stifft an der lehenschafft vnd menigclichen an seinen rechten vnuergriffenlich, ohngeuerdte. [Mit] vhrkhundt des brieffs. Geben zw Passaw, am mitwochen nach St: Colmans tag, alls man zellt von Christi gebuertt 1467. jahr."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 701, S. 763