"Wir Fridreich von Gots genaden Romischer kaiser, zu allen zeiten merer des reichs, zu Hungeren, Dalmacien, Croacien etc. kuenig, herczog zu Osterreich, zu Steir etc. Embieten vnserem getrewen Symon Oberhaymer, vnserem pfleger zum Valkenstain, vnser genad vnd alles guet. Vns haben der ersam geistlich vnser lieb andaechtig Andre brobst vnd der conuent zum Slegel anbracht, wie jr vicari der pffarkirchen zu Rorbach, so jn vnd jrem gotshaus ingeleibt vnd durch vns bestaett ist, mit tod abgangen sey, dadurch sy dann die regierung der selben pffarkirchen ainem jrem conuent bruder vncz auf jr wider rueffen beuolhen vnd darczu geordent habent, den du aber nicht angeen lassen wellest, dich der possess der selben kirchen vnderwunden habst, jm die vorhaltest vnd mainest, das sy zu regierung der selben pffarkirchen ain ewigen vicari seczen vnd ordnen sullen, des sy sich beswärtt vnd vns froemd bedunkt vnd nicht geuelt, nach dem die jnleibung vnd incorperacion der selben pffarrkirchen klarlich jnnhalt, das sy die selb pffarrkirchen durch ainen ewigen vicary oder aber ainen bruder aus jrem closter auf ain zeit regieren mugen, vnd nicht verpflicht noch schuldig sein, die durch ainen weltleichen briester oder ewigen vicary zu regieren. Empfelhen wir dir ernnstlich vnd wellen, das du die benanntten probst vnd conuentt bey der jnleibung vnd incorperacion der selben pfarrkirchen berueblich bleiben, die beruert jr pfarrkirchen durch ainen jren conuent bruder, wie jn das am pesten fuegt, nach lautt der selben jrer incorperacion regieren, vnd den so sy darczu ordnen werden, an jrrung vnd hindernuss zu der gewer vnd possess der selben pffarrkirchen komen lassest vnd darjnn nicht anders tuest, damit vns als landfuersten vnd obresten vogten der selben, gotshaus vnd pffarkirchen nicht not werd, dich darumb in annder weg fuerzenemen. Das ist grünttlich vnser ernstlich mainung. Geben in vnser stat Collen am Reyn, an freitag vor sand Anthony tag, anno Domini etc. lxxiiijto, vnsers kaisertumbs im zway und zwanczigisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 452, S. 498-499