"Joannes(1) diuina prouidentia abbas sanctæ Margarethæ in Osterhouen, Præmonstratensis ordinis, Patauiensis dioecesis, per reuerendissimum jn Christo patrem et dominum, dominum Hubertum(2), eadem permissione abbatem Præmonstratensem, in regnis, partibus et circarijs Boemiæ, Poloniæ, Bauariæ, Sueuiæ, Austriæ, Silesiæ, Morauiæ, vicarius generalis et visitator specialis in potestatis plenitudine, tam in spiritualibus quam in temporalibus specialiter deputatus; reuerendis ac venerabilibus in Christo patribus et dominis, Strahouiensi(3) alias Montis Syon, Toeplensi(4), Milocensi(5) et Siloensi(6) abbatibus, necnon et Gottieschouiensis(7) et Doxanensis(8) monasteriorum monialium præpositis, nostri Præmonstratensis ordinis, salutem in Domino, et studiosam nostris, imò verius præfati domini nostri reuerendissimi mandatis diligentiam adhibere, venerandi patres, amici sæculares. Cum inter sollicitudines varias, quibus angimur, non posterior imò anterior et potior [cura](a) executionis et accurationis ex debito obedientiæ nostræ religionis, et officio vicariatus, commissionisque, quibus in præsentiarum arctius constricti angimur, exigat, vt ad viuendi formam rectam et ad viam salutis, vniuersos nostræ religionis in circarijs ante dictis ab obseruantia regulari deuiantes, etiam inuitos, exhortationibus et alijs modis, quibus possumus, reducamus: et alias considerando necessitates dictarum circariarum [eiusdemque] iuxta nostræ paruitatis modulum prouidendo, et pacem exinde sequi inter prælatos et religiosos atque obedientiam; et in vtilitatem eorundem redundari, Deo adiuuante, speramus. Et quanquam singula monasteria vestra, in forma vicariatus et commissionis, vsque ad reuocationem, quoties opportunum fuerit, personaliter de loco in locum visitare habeamus in commissis; parcere tamen cupientes maioribus expensis, nec non ad infortunij discrimina cautius abigenda, cæteraque grauamina deuiare satagentes, et vt mandatis superiorum nostrorum aliquale sortiamur complementum, vobis omnibus generaliter et cuilibet in solidum, jn virtute salutaris obedientiæ districte præcipiendo mandamus, quatenus assumpto vobiscum quilibet sui monasterij priore, aut alio seniore fratre conuentuali ab eodem conuentu procuratorium plenum habente, omnibus posthabitis occasionibus vndeuigesima die mensis martij, quæ erit feria tertia post Oculi dominicæ jnstantis quadragesimæ jn monasterio Slagensi(9) nostri ordinis, Patauiensis dioecesis [conveniatis,] vt quilibet vestrum conueniat, atque ibidem vos ad hospitia recipiatis, et quilibet vestrum recipiat: Die verò immediatè sequenti, videlicet feria quarta, coram nobis et collegis nostris(10), hora capitulari in prædicto monasterio, quod ad hoc elegimus, cum continuatione dierum sequentium legitime compareatis, et quilibet vestrum compareat, ad audiendum et videndum nostrum vicariatus et visitationis officium, ac commissionis processum in vos et quemlibet vestrum, ac obedientiarios vestros jnstitutum; nec non ad satisfaciendum nobis de tallijs(11) tam ordinarijs quam extraordinarijs, tam de anno præsenti, quam de etiam retroactis et futuris annis, alijsque juribus ordini nostro debitis, atque ritè impositis; ad ordinandum, exercendum, atque disponendum ea, quæ monasterijs vestris, et personis vtilia et decentia perspexerimus, auisantes vos et quemlibet vestrum, quod si in loco et termino coram nobis, quod non putamus, non comparueritis, contra vos et quemlibet vestrum non comparentes, auctoritate nostrarum vicariatus et commissionis [indubie] procedemus, vestra vel sua contumacia non obstante. Præsentiarum latorem de suo salario contentum fieri demandamus, cuius relationi de executione stabimus contenti. Datum [nostro] è monasterio Osterhouen, die jouis octava die [mensis] februarij, anno Domini Mo CCCCo LXXVIo, [nostro] sub sigillo minori præsentibus in fine impresso."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 459, S. 506-507