"Ich Caspar Sigstain(1), gesessen jn der Zcell(2) bey Vellden: Bekenn fuer mich, mein hausfrawen, mein kinder vnd meine enengkel vnd all vnnser eribn, vnd thun kund mit dem gegennbuerttigen brief allermênigklich, das jch [...](3) den erwirdign jn Gotte vattern vnd geistlichen herren, herrn Andreen(4) brobst, Egidy(5) prioren vnd dem ganntzen conuent des w[irdi]gen gotzhaus vnnser fraun Slag, auf mich, mein hausfrawn, meine kinder vnd der selbn kinds kinder bringt, jn zal drej sipp[en d]as die elich gebornn sein oder werdn, gekaufft hab ain leibgeding der zehent hie jn der Czell auf den gruenten vnd stuekch[en, so] hernach geschribn: Von erist auf dem guet, do Caspar Sigstain auf sitze; jtem auf ainer hofstat, do Rueprecht Praiten[uel]der(6) sitzet; jtem auf ainer hofstat, do Vlrich Sigstain(7) sitzet; auf den beruertten drein stuekchen ganntzen zehennt; jtem aber auf [ain]er hofstat, do Hanns Weber(8) sitzet; jtem auf ainer hofstat, do Jorig Praitenuelder(9) sitzt; jtem auf ainer hofstat, dj des Lienhart Weber(10) [...] nebn Joerigen Praitenuelder gelegen; jtem auf ainer hofstat, do Sigmund Smid(11) sitzet; auf den egenantten vier hoffstetn halben zehent, dauon wir dann jaerlich jn das bestimbt jr gotzhaus oder wem sy das schaffen ze gebn, raichen vnd dienn soelln vnd welln ain halb phund phening landgaebiger muenss zu rechter dienstzeit vnd nicht mer, vngeuaerlich. Ob wir jn aber darjnne verzugn wider yern willen vnd jn solchn dienst vorhieltn vnd nicht ausrichteten oder richten woldten, als dannen moechten sy oder ir nachkomen sich der beruertten zehent aller vnd yeder mit aygem gewalt vnbeklagt vnd vngehindret allermênigklich wider einziehen, selbs nuetzen oder anderen verlassen, damit hanndln vnd thun, alls mit anderen des gotzhaus gulten vnd guetern, vngeuarlich. Wann dann jch obgenantter Sigstain, mein hausfraw, meine kinder vnd der selben meiner kinds kinder, dj elich gebornn sein oder werdn, alle mit tod verganngen sein, es sein dj zehent jn vnnsrer gewalt oder anderer, den wir vnnser leibgeding darauf verkaufft hietn, vnd zu was zeit oder mit was nuetzen dj funden wuerden, alls dannen vnd damit sollen sy jn vnd yerm gotzhaus wider haim geen an mênigklichs jrrung vnd hindernuss. Ob vnns dann not beschaech, zwischen der zeite das beruerete leibgeding ze verkauffenn, so sollenn wir sy oder dy jren nachkomen das am eristn anpieten; wolten oder moechten sy es aber nicht kauffen, so solln wirs gebm ainem vnserm genossen, dauon sy jrs dienst jarlich bekomen moegn, vnd solchs widerfals nach vnnserem abganng gewarttend sein vnd kainem annderen, der jn ze vebersweng waere. Des zw vrkund gib jch obgemelter Sigstain den brief, verfertigt vnd wolbestaett mit des edln vesten Mertten Oeder(12) zu Getzenndorff, vnd des erberen weisen Sigmunden Vorawer(13) an der zeit lanndrichter vnd markchtrichter zu Haslach, baider anhangunden jnsigel, dj jch mit vleiss darumben gebeten hab, jn jren eribn nachkomen vnd jnsigel an schadn. Darunder jch mich obgenantter Sigstain fur mich mein hausfrawn kinder vnd enengkel all vnnser eribn miteriben, fruendt vnd nachkomen vestigklich verpind mit meinen trewn an aydes stat, jnnehalt des briefs war vnd stat ze halldn. Der gebn ist ann sambstag vor sannd Kathreintag des jares, do man zalt von Cristj geburd vierzehenn hundert vnd jn den segsundsybenntzigisten jaren."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 460 (S 327), S. 507-508