"In nomine Domini amen. Venerabili in Christo patri necnon religiosis et Deo deuotis viris et dominis, domino Andree(1) preposito, Egidio(2) priori, totique conuentui monasterij beate Marie virginis in Plaga, ordinis Premonstratensis, Patauiensis diocesis. Nos fratres Marcus(3) abbas, Andreas(4) prior totusque conuentus monasterij sancti Egidij in Trzebon(5), alias in Witignav, canonicorum regularium ordinis sancti Augustini, Pragensis diocesis. Cum deuotis oracionibus reuerencie et obsequij totum posse, pensantibus nobis et animo solicite reuoluentibus, quod homo velud vmbra velociter transeat et velud lanugo, que flatu venti tollitur, et ceu fumus dispersus in aere quasi in nichilum redigatur, nec tunc sciri possit, quis sit dignus odio vel amore, expedire videbatur super omnia et ad hoc operose intendere, quomodo mutuis oracionibus et labore transitorio quietem perpetuam possimus emercari. Hinc est, quod nos fraternitatis vere consorcium totis nisibus affectantes, vos omnes et singulos de omnium nostrorum voluntate et consensu in nostram fraternitatem recipimus, vobisque ac successoribus vestris promittentes veram ac legittimam tam viuis quam defunctis confratribus fraternitatem exibere et ea impendere, que nostris confratribus pia et approbata nostri ordinis consuetudine impenduntur, videlicet vt cum dies obitus vnius vel plurium vestri monasterij nobis fuerit intimatus, quem Dominus felicem faciat, mox pro ipsius vel ipsorum remedio animarum die competenti psalmis defunctorum, scilicet ,verba‘ etc. in capitolo lectis de sero vigilias defunctorum integras cum compulsacione campanarum et in crastino missam defunctorum sub nota solemniter cum commendacione peragemus. Jnfra quam vel alio die, quo id fieri poterit, singuli sacerdotes singulas missas pro eodem vel eisdem legent defunctis et fratres minorum ordinum vnam quinquagenam, laici vero conuersi centum pater noster cum totidem aue maria explebunt, nomenque eius vel ipsorum nostro libro mortuorum inscribentes. Jnsuper singulis annis pro omnibus fratribus vestri monasterij in generali semel dumtaxat in anno cum vigilijs minoribus et psalmis predictis ac vna missa, tantum sub nota sine commendacione tenebuntur. Vt qui nexu amoris corporalis hic in Christo coniungimur, solutis corporibus in requie beata feliciter congregemur. Ne autem predicta compromissio mutue fraternitatis nostre aut successorum nostrorum ex parte futuro tempore quoquomodo priuari valeat, robore sue perpetuitatis presentem litteram sigillorum nostrorum abbatis et conuentus munimine duximus roborandam. Datum in monasterio nostro Trzebonensi alias in Witignav, quinta die mensis magij, anno Domini millesimo quadringentesimo septuagesimo sexto."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 463 (S 329), S. 510-511