"In nomine Domini. Amen. Reuerendo jn Christo patri et domino ac venerabilibus viris religiosis fratribus et dominis, domino Marco abbatj, Andree priori, totique conuentui cenobij sancti Egidij jn Trzebon, alias in Witingaw, ordinis canonicorum regularium sancti Augustinj, Pragensis diocesis. Frater Andreas prepositus, Egidius prior, ceterique fratres tocius conuentus monasterij gloriose et beate Marie semper virginis jn Plaga, alias jn Schlaga, ordinis Premonstratensis, Patauiensis diocesis. Ex interiorj cordis affectu dant et exhibent suas deuotissimas jn Domino oraciones obsequiaque regularius prestantissima, reuerende pater et viri religiosi jn Christo sincerius deuotj, cum ex origine primorum parentum fragilitas humane nature vix et raro absque macula peccatj bone consciencie et saluberrime racionis in hac vmbratica vita viuere poterit, quin pocius homo coarceat suam viam ad vitam, testante Domino per Matheum ewangelistam, quod via est arcta, que ducit ad vitam et paucj inveniant eam. Et cum omnes vniuersaliter expectamus diem mortis et tempus districti judicij nostre cordis expedit et necesse est, vt ne dum illorum, qui jn celesti jvrarchia [!] cum Christo regnant, sed eciam bonorum hominum hic in terris degencium laboriose spiritualia suffragia jmploramus, quorum id dignum super omnia diuine voluntatj acceptabile reputamus. Et quamuis ex caritatis debito omnibus teneamur jllis tam longe amplius, quorum deuocionem certis beneficiorum judicijs clarius experimur velutj clara experiencia per litteras patentes apud vos cognoscimus. Qua propter nos dicti, Andreas prepositus, prior, totusque conuentus vnanimo consensu suauissimoque affectu vestris caritatibus obtemperantes, decreuimus vobiscum perpetue fraternitatis vnionem statuere atque jnire, vosque omnes et vestros successores in eandem nostram confraternitatem recepimus, acceptamus et tenore presencium jn Dei nomine perpetue confirmamus. Promittentes deinde sincera deuocione, quod cum obitus et ab hac miseria vita decessus cuiusvis vestrum, quem Deus jn eterna tabernacula conseruet, nobis cognitus fuerit, quod extunc omnia diuina exequia et obsequia que alijs nostris confratribus ex longo retrofluxo tempore consweuimus [!] perficere, eadem diligencius perficienda curabimus cum psalmis, vigilijs, missis et oracionibus ac participacionem omnium bonorum jn vita pariter et in morte per nos et posteros nostros exnunc et deinceps ex Dei clemencia fienda. Denique et insuper nomen cuiuslibet sic in Domino defuncti, jn martirilogio nostro perpetue ascribi et inscribi procurabimus. Jn cuius rei testimonio presentes litteras sigillis nostris tam prepositure quam et conuentus jmpensione munitas et roboratas tradidimus ipso die saturnj, vicesimo quarto mensis agustj, anno Domini millesimo quadringentesimo septuagesimo sexto."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 464, S. 511-512