"Ich Elspet Kapplanjnn(1), Lienharten Kapplans saeligen eelichen tochter. Bekenn, das fuer mich chamb Woelfl(2), Hannslen in der Jnndern Oed saeligen sun, gab mir auf zway tail zehnt auf aim gut jn der Jnndern Oed(3) jn Sarleinspekcher pfarr vnd Veldner landgericht gelegen, mein vnd meiner swesster Anna lehnschafft, vnd bat mich mit vleiss, denselben zehnt Stefflein am Ruedersdorff(4) zuuerleihen, wann er jm den redlich zu kauffenn geben hyette. Das jch also getan, verlihen habe vnd leich jm den als sein kauffts gut, wissentlichn mit dem brief, waz ich jm zu recht daran verleihen sol oder moge. Also das er vnd sein eriben den benanten zehnt mit seiner zugehoerung nun fuerbas von mir vnd meinen eriben jn lehns weyse jnnhaben, nuttzen, nyessen vnd nemen; auch in aller vordrung dauon gehorsam vnd gewaerttig sein sullen, als recht lehens, landes Oesterrich ob der Enns recht ist angeuaerd. Mit vrkundt des brieffs vnder meinem anhangunden jnsigill, doch mir, meiner bemellten swesster Anna vnd vnnsern eriben an vnnserer lehnschafft, rechten vnd vordrungen vnuergriffen vnd an schaden. Der geben ist nach Cristj gepurde vyerczehn hunndert vnd jn dem dreyn vnd achczigisten jare, an mantag nach sand Peter vnd sand Paulstag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 492 (S 346), S. 549-550