"Wir Cristoff(1) von Gottes genaden bischoue zw Passaw. Bekennen das fuer vnns komen vnnser getrewer Caspar Staudinger(2), richter zw Aschach, vnd Hanns Schreckhinger(3), burger zw Haslach, vnd baten vns diemuetigklich das wir jn als lehentragern Magdalenen vnd Margrethen weylend Wilhalm Huber(4) zw Haslach verlassen kinder, das gut zw Egkhartsrewt(5) in Pewrbegkher pfarr gelegen, vnnsers vnd vnnsers stifft lehenschafft geruechten zuuerleyhen, wan das erblich an sy komen were. Das haben wir getan vnd jnn das benant gut zw der egenanten Magdalen vnd Margreth hannden verlihen, leyhen auch wissenlich mit disem brieff, was wir zurecht daran verleyhen sollen oder muegen. Also, das sy das nw furpas von vnns, vnnserm stifft in lehennsweis jnnhaben, nutzen vnd niessen sullen vnd mugen, als lehens, lannds vnd vnnsers stiffts recht ist, doch vnns vnd demselben vnnserem stifft an der lehenschafft vnuergriffenlich angeuêr. Mit vrkund des brieffs, geben zw Passaw, an sand Steffans tag im schnitt, nach Cristj geburde virtzehen hundert vnd im virundnewtzigisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 528 (S 372), S. 593