"Ich Dorothea, weilennd maister Micheln Stainmecz(1), burger zu Haslach saeligen gelassen witib, wonund jm spital zu Krumbnaw(2). Bekenne fuer mich vnd all mein erben offennlichen mit dem brieue, allen den er fuerkumbt, das ich mich mit meins benannten hawswirt saeligen, naegsten fruendten, auch mit vnnser baider eelichem kind Barbara von meins zubringen vnd widerlegung, auch ains geschefthalb, so ich vermaint, mir mein lieber hawswirt saeliger thann solt haben, durch frumer erber lewtt zu baiderseitt wilkuerlich dartzue gegeben, lieplich vnd fruentlich, auf ain ganncz staets ennde veraint vnd vertragen vnd mir zusambt dem, so ich vorhin herdan bracht hab, ain summa gellts heraus gesprochen haben, der mich ycz wolbenuegt, fueran mich vnd mein erben auch benuegen soll. Darauf ich mich benannte Dorothea vnd fuer all mein erben gegen dem bemellten, meinem lieben kind Barbara vnd allen seinen erben, auch des hawss zu Haslach, auch alles aigem vnd varundem gut, so mein benannter hawswirt saeliger hinnder sein lassen hat, wo das gelegen ist, wenig oder vil, nynndert noch nichts des ausgenomen noch besundert; des alles verzeich zu gannczer, staetter, ewiger fuerczicht wissenntlich in krafft des briefs, darumb zu jn noch zu dem haws vnd allem gelassen gut yecz bemellt kainerlay zuspruch, anuordrung noch gerechtigkait nicht mer haben suechen sullen noch wellen, mit oder an recht, in kainerlay weiss, alles trewlich angeuerde. Sy sullen vnd muegen nw hinfuer allen jrn nucz vnd frumen betrachten, damit hanndeln vnd tun, wie sy verlusst, an mein, aller meiner erben vnd an menigclichs von vnnsern wegen jrrung vnd hindernuss. Ob ich aber bemellte Dorothea, mein erben oder annder yemannds von vnnsern wegen wider solh bemellt vnnser verzeihung mit jn ainicherlay krieg oder ansprach anerhueben, mit oder an recht, wie das waer, des sy schaden naemen, wenig oder vill, kain schaden ausgenomen, denselben schaden allen sullen vnd wellen wir jn abthun vnd widerkeren. Sy sullen muegen auch des alles haben vnd bekumen bey mir, meinen erben, trewen, hab vnd gutt, wo wir das haben vnd gewynnen, besuecht vnd vnbesuecht, nichtz ausgenomen, vnnczt sy aller jrer schaeden dauon benuegig sein, alles getrewlich angeuerde. Mit vrkundt des briefs, besigelt durch meiner vleissigen bete willen mit der edlen, vessten Connraden von Petrobicz(3), spitalmaister zu Krumbnaw, vnd Anndre Stayner(4), renntschreiber daselbs, baider aigen anhanngunden jnnsigeln, doch in, jren erben vnd jnnsigeln an schaden. Darunder ich mich benannte Dorothea vnd all mein erben, mit meinen trewen an aides weiss verpinde, jnnhallt des briefs war vnd staet zu hallten; der geben ist nach Cristi vnnsers lieben herrn geburde tausent vierhundert vnd in dem fuenfundnewnczigisten jaren, an freitag nach sannd Mathias tag apostoli."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 529 (S 373), S. 593-594