"Ich Georig Odenréwter(1), jch Thoman(2) gebrueder, jch Katherina(3) des Hackel zw Etzleinsrewt hawsfraw, jch Anna(4) des Steffan Túnawpawern hawsfraw, vnd alle viere Lienharten(5) des Odenrëwter seligen glassen kinder: Bekennen vnuerschaidenlich fur vns vnd all vnser erben, freunndt vnd nachkomen offennlich mit dem brief, wo der fürkumbt, das wir veraintlich recht vnd retlich verkauft vnd ze kauffen geben haben wissentlich vnd in kraft des briefs vnnsern gantzen zehent auf ainem gut zu Czmolsöd(6), der freys aigen ist, gelegen in Rorbeker pfarr vnd Velldner lanndgericht, dem erberen weisen Hannsn Krenawer(7), burger zu Rorbach, seiner hawsfrawn vnd allen iren erben, vmb ain summ gelltz, der wir gantz ausgericht, gewert vnd bezallt sein zu rechten tegen vnd an allen schaden. Darauff verzeihenn wir vns des benanten zehent mit aller seiner zuegehorrunng nichtz ausgenomen zu rechter stetter vnd ewiger furzicht wissenlich vnd in kraft des briefs. Es mag auch der Krenawer vnd sein erben mit dem zehent zu Czmolsöd, seiner zuegehorrunng woll hänndeln vnd tun mit versetzen, verkauffen, geben, machen vnd schaffen, wem sy wellen, an all vnser irrunng, geistlichs vnd welltlichs rechten ongeuerde. Wir sein auch des genanten Krenawer vnd seiner erben vmb den kauff des zehennt halb ir recht gewern vnd furstand fur all rechtlich onsprach, als dann solichs kauffs, gewerschafft, lanndes ob der Enns recht ist, alles getreulich vnd vngeuerlich. Zw vrkunnd senndten vnd geben wir dem bestimbten Krenawer vnd seinen erben den brief, besigillt mit des edlenn vesstenn Altmans Perger(8) auf dem Perg aigen anhangunden insigill, den wir mit allem vleis hant gelobten trewen vleissig darumben gepetten haben, jm, sein erben, besigillen an schaden. Darunnder wir vns all verpindten, alles ze hallten, so uoran geschriben stet. Der gepett vmb das insigill vnd zewgen sein dy erbern weisen Jorig Preuer Hoff(9), Hanns Jorig Pasch[in]ger(10), Sigmund Weber(11), all burger zu Rorbach, vnd mer frumer lewt genueg. Ge[ben] an sand Paulstag seiner bekerrunng, nach Kristi gepurd vierzehenn hundert [vnd](12) jm sechs vnd newntzkistenn jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 531 (S 375), S. 598-599