Urkunde 534.a:||
||
"Ich Sighart abm Perig(1) zw Viechofen(2) bekenn fúr mich vnnd an stat meins prúder Sebastian(3), der noch nit verobber ist, da fur ich mich an genumen hab, vnnd fur all vnnser erimb vnnd miterbnn, vnnd thain khunndt offennlich mit dem brief allnn lewttnn, dj her fur khoment gelesen oder gezaigt wirt, das wir nach rat vnnsers pesstnn fraundt wolbedächtlich zw den zeittnn, da wir das wol thain mochttnn, recht vnnd redlich zw khauffenn geben habm vnnsernn zehent am Grépllhoff(4), da von man vnns am drittn iar dint hat drey schiling phening, den wir ze kauffen gebn habm mit allen den eren vnnd rechtnn, wie wir den ingehabt, genüczt vnnd genossen habm, vnnd vor allter her khumen ist, dem erbern vnnd weissm Andre Tanczepher(5), Elspett sein hausfraw vnnd ir baider erbenn, vmb ain suma gelts, der wir von im zw rechttnn tägn bezalt sein. Es mag auch der benent Andre Thanzzepher, Elspet sein hawsfraw vnnd ir baider erbnn mit dem zehennt vor benent, all sein frumen da mit schaffenn mit versecznn, verkauffenn, verschaffenn, machenn vnnd gebnn, wem sew verlust, an vnns vnnd vnnser erbnn irrung vnnd hinndernuss. Jch obgenantter Sighart abm Perig zw Viechofen bin auch mit sambt meinem pruder Sebastian vnnd vnnser erbenn des benantten Andre Tanzzepher, Elspett sein hausfraw vnnd ir baider erbenn ir rechter gewêr, fürstanndt, scheribm, alls solichs kaufs aygnn im landt Österreich oberhalb der Enns vnnd vntterhalb der Enns recht ist. Ob in aber icht krieg oder anspruch auf erstuendt, von wem das wär, von vnnsern wegn mit recht, des sew schadn nemen, den selbing schadnn mit sambt dem haupgutt geloben wir in auss richttn vnnd wider khernn, vnnd schullnn das alles habenn zw vnns vnnd zw vnnsrenn erbnn vnuerschaidenlich, vnnd auf all vnnserm gutt, das wir habm im landt Osterreich oder wo wir das habenn, es sei erib oder varundt gutt, wie das genant vnndt wo das gelegn ist, nichtz ausgenomen, wir sein lebentig oder tod, trewlich vnnd vngeuerlich. Des zw ainem warn vrkundt gib ich obgenantter Sighart abm Perig fur mich vnnd mein pruder vnnd vnnser erbnn dem vorgenanttn Andre Tanzzepher, Elspet sein hausfraw vnnd ir baider erbenn den brief, gesidllt mit meinem aygnn anhanguntten insidll. Der sachen ist gezewg durich mein vleissig gepett willen der edll vnnd vesst Altman abm Perig(6), mein lieber vetter, mit seinem anhangunttn insidll, doch im vnnd sein erbenn an schadnn. Gebm nach Cristi gepurdt vnnsers herrnn tausent vierhundert vnnd im sechs vnnd neuczigisstnn iar, an sannt Mertens tag, des heyligen bischolff."||
||
Urkunde 534.b:||
||
Ähnlicher Text wie in der Urkunde 534.a, jedoch wird der Zehent am Chöblen(7) dem Jörg Großhaupt(8) zu Peilstein und seiner Frau Anna verkauft.

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 534.a-b (S 378), S. 601-602