"Ich Wolfganng(1), briester Passawer pistumb, jch Hanns, jch Caspar, jch Walthazar, jch Jörig, jch Barbara, jch Anna, alle geswistret vnd weilennds Jorign Sneider(2), burger zu Rorbach seligen kinder: Bekennen samentlich vnd sonnderlich fur vnns, all vnnser erbn, miterbn, freundt vnd nachkomen offennlich mit dem brieff, wo der furkhumbt, das wir vnuerschaidenlich verkhawft vnd kewfflichn ze kauffen gebn habn wissentlich in crafft des brieffs den zehent vnnsers vatterlichn vnd mueterlichn erbs auff dem guet zum Hasen(3) jn Rorbekher pharr vnd Feldner lanndegericht gelegen, mit aller seiner zuegehorung den ersamen bruedern vnd swesstern der loblichn bruederschafft vnnser liebn frawen zech(4) des wirdigen gotzhaws sand Jacob zu Rorbach vnd sonnderlichn dem erb[er]n Wolfganngen Springer(5) zu Horaw als zechmaister vnd lehentragern daselbs vnd alln seinen nachkomen, der dan berürt von dem edlen gestrenngn ritter herrn Wolfganngen Herleinsperger(6) zu Tannberg als erblehen herrn vnd seinen eribn mit des gunst, willn vnd wissen der kauff beschehn, vmb ain sumb gellts, der wir gantz ausgericht, gewert vnd bezallt sein zu rechten tegen vnd on allenn schaden. Wir habn jnen auch den zehennt, mit vorbemellts vnsers gunstigen lehennherren hanndt vbergebn, abtretten vnd ingeantburt, als dan solicher lehen der rechtlehen vnd lanndes ob der Enns recht ist, vngeuerlich. Der ||
genant lehentrager Wolfganng Springer anstat der bruederschafft mag mit dem berurten zehennt zum Hasen wolhanndln vnd thun mit versetzn, verkauffn, hin lassen oder selbs fessnen zu notdurft des gotzhaws vnd bruederschafft, doch das alle handlung beschehe mit lehenherrn hanndt, brieff vnd sigill, an vns vnd von menigklichs von vnnsernt wegen aller rechten, geistlichen vnd weltlichen, jrrnuß vnd hindernuß. Sein auch solichs bewerer vnd furstanndt fur all rechtlich ansprach, alsdan solichs kauffs, belehents guets vnd lanndes ob der Enns recht ist, mitsambt aller gewerschafft vnd irem genomen schadn bej vnns geswistrettn von ainen auff das annder vnd vnnser erbn hab, erb vnd guet ditz kauffs an schadn sein vnd beterffen, alles getreulich vnd vngeuerlich, wo der brieff zaygt vnd gelessen wirdet. Mit vrkhund des brieffs, besigillt durch vnnsers offennber brieffs fleissiger pet willn, mit des edlnn, gestrengen ritter herrn Wolfganngen Herleinsperger als lehenhern aigen anhanngunden jnsigill, jm, seinen erbn, besygln vnd aller lehenschafft, stand vnd anlaitt vnuergriffenlich vnd on schadn. Mit ewiger verpindnuß, alles war vnd stett ze halltn, so an disem kauffbrieff geschribn stet. Der sachn sein zewgen gebett, vmb jnsigill auch bey dem kaufft gewesen die erweysen Wernhart Prantel(7), Petter Schuester(8), baid burger zu Rorbach, vnd mer frumer lewt genueg. Geben an monntag nach sand Veitstag, nach Cristy geburde funffzehenn hundert vnd jm syben vnd newntzkissten jare(9)."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 677 (S 485), S. 741-742