"Wir Cristoff(1) von Gots genaden bischoue zu Passaw; bekennen daz fuer vns komen ist vnnser getrewer Hanns Meltzner(2), zechmaister sand Niclas gotshaws zu Haslach, vnd brachte fuer vns ain aufsanndbrief von Dorothea(3), weilennt Sigmonnden Vorawer(4), richter zu Haslach seligen verlassen witib, vber das gut zu Egkhertz Rewt(5) in der Voraw, in Pewrbegkher pharr vnd lanndtgericht gelegen, so von vns vnd vnserem stift zu lehen rueret, ausganngen, vnd bate vns diemuetigklich, daz wir dasselb gut mit seiner zugehoerung dem wirdigen gotshaws sand Nicla zu Haslach, so bemelte Dorothea darzu geordennt vnd gewidennt hat, gnedigklich geruechten zuuerleihen. Haben wir angesehen derselben Dorothea, auch des benanten zechmaister vleissig vnd diemuetig bete, vnd damit der gotsdinst gefuerdert vnd gemert werde, jm als zechmaister das vemellt gut zu Egkhertz Rewt mit seiner zugehoerung gnedigklich verlihen, verleihen jm das auch wissenlich in craft des brieuss, waz wir daran zu recht verleihen sollen oder moegen. Also daz er vnd ain yeder zechmaister zu Haslach, wer der zu zeiten sein wirdet, das obgemelt gut zu Egkhertz Rewt mit seinem zugehoeren zu des bemelten gotshaws sand Nicla zu Haslach hannden, von vns vnd vnnserem stift in lehensweise jnnhaben, nuetzen vnd niessen, als er das zu tun schuldig ist. Auch wann wir oder vnnser nachkomen bischouen zu Passaw mit tod vergeen vnd ain kuenftiger herr vnd bischoue seine lehen beruffen vnd verleihen wirdet, daz dann ain zechmaister, der dieselb zeit sein wirdet, das benant gut mit seiner zugehoerung zu lehen emphahe, wie lehens, lands vnd vnnsers stifts recht ist vngeuerlich. Mit vrkund des brieues. Geben zu Passaw an mitichen nach sand Gallentag, nach Cristi geburde viertzehen hundert vnd im achtundnewnzigisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 544 (S 384), S. 611-612