"Bartholomeus(1) miseracione diuina abbas Milocensis monasterij, Premostratensis ordinis, Pragensis diocesis, pater abbas cenobij Plagensis, ad vniuersorum noticiam cupimus aduenire, quod prepositura monasterij Plagensis, eiusdem ordinis, Patauiensis diocesis, per obitum reuerendissimi in Christo patris et domini, domini Johannis(2), vltimi et inmediati, dum vixerit, prepositi vacauerit et pastorali solacio penitus fuerit destituta; cuius eleccionis confirmacio de iure ad nos tanquam ad patrem abbatem dicti cenobij dinoscitur pertinere, dominus prior et fratres canonici dicti monasterij pensantes solicite vaccacionem diurnam dicte prepositure his precipue temporibus satis periculosam fore et propterea iuxta morem hactenus obseruatam ad eleccionem futuri prepositj ex nostro indulto et mandato specialiter procedens, seruatis rite solemnitatibus a iure debitis et consuetis, atque invocata spiritus sancti gratia, religiosum honorabilem atque reuerendum patrem dominum, dominum Nicolaum(3), eiusdem ordinis fratrem de gremio reuerendissimi in Christo patris et domini, domini Bartholomei, abbatis monasterij Milocensis, [virum] vtique discretum, prouidum, hospitalem, ceterisque virtutibus et moribus ornatum ac insignitum, diuina inspirante gracia, in eorum prepositum vnanimiter et concorditer elegerint, nullo contradicente, prout in decreto eleccionis super hoc confecto, plenius continetur, vnde pro parte domini prepositi electi per venerabilem patrem et dominum Pangracium(4) priorem, Leonhardum(5) subpriorem, Pangracium(6) seniorem et Casparem(7) procuratorem, totumque conuentum predicti monasterij nobis humiliter fuerit supplicatum, quatenus eleccionem huiusmodi canonice celebratam confirmare, ratificare et aprobare dignaremur. Nos itaque peticionibus huiusmodi annuentes, generaliter omnibus et singulis, si qui essent, qui sua cederent interesse vel qui huiusmodi eleccioni et electe persone possent et vellent opponere in termino ad hoc peremtorio constituto, ipsius eleccionis ac decreti forma ac meritis eligencium et sufficienti testimonio de persona, habilitate predicti electi visis habitis et diligenter examinatis ac sufficienti informacione premissa, cum nichil reperimus, quod eidem eleccioni uel electe persone obsisteret ipseque electus plene et mature etatis, in sacerdocio constitutus, ex legitimo matrimonio natus, vita, morum, sciencia merito commendandus ad dictam preposituram quam plurimum sufficiens per nos repertus fuisset, auctoritate nostra, qua in hac parte tanquam pater abbas fungimur eleccionem predictam confirmauimus, ratificauimus, approbauimus et per presentes Dei in nomine confirmamus, ratificamus et approbamus, ipsum quoque reuerendum patrem dominum Nicolaum prenominatum de prepositura prefati monasterij Plagensis per annuli nostri tradicionem et manuum inposicionem inuestiuimus et presentibus investimus in Dei nomine. Curam seu administracionem ipsius monasterij Plagensis in spiritualibus et temporalibus plenarie conmittentes, mandantes insuper omnibus et singulis fratribus dicti monasterij tam conuentualibus quam parochialium ecclesiarum rectoribus aut ipsorum vice gerentibus, quatenus pretaxato patri domino Nicolao preposito debitam obedienciam faciant et consuetam, ipsumque in possessione non inpediant nec quantum in eis est inpediri permittant, atque sibi de prepositure fructibus, redditibus, prouentibus et iuribus et obuencionibus vniuersis a colonis et censitis ac alijs eiusdem monasterij subditis plenarie et integre faciant responderi, secus vere facturi, alias grauissimas penas ordinis ac excommunicacionis sentenciam se nouerint incursuros. Jn quorum omnium et singulorum fidem et testimonium premissorum presentes litteras, sigillo nostro maiori abbacie iussimus muniri. Actum et datum in monasterio Plagensi, octaua die mensis septembris, anno Domini millesimo quadringentesimo nonagesimo nono."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 548 (S 387), S. 618-620