"Ich Hanns Schopper(1), burger zw Haslach: Bekenn für mich, mein hawsfraw, all vnnsser erbm offennlich mit dem brieff allen den er furchwmbt, das jch durchslecht zw ainem stätten ewigen khawff käwfflich ze khawffen gebm hab, gib awch wissennlich mit krafft des brieffs nach dem aller pessten form vnd rechten, so es dann yetzo oder hinfüran zw ewigen zeytten nach des lanndes ob der Enns krafft vnd macht kan habm soll vnd mag, den erbern Hannsen Schneyder(2) vnd Hannsen Meltzner(3), baiden burgern zw Haslach vnd derzeit zechlewtt, jnnhaber vnd verweser des wirdigen gotzhaws sanndt Nicla(4) daselb, auff dem hoff zw Zaglaw(5) vnd auf der müll(6) daselbs, vberall ganntzen zehennt mit seiner zugehorung, jnn sanndt Steffanns pfarr vnd Wächsenwerger lanndtgericht gelegen, vnd jst freys aygen, vmb ain suma gellts, des sy mich an statt bemellts gotzhaws mit ganntzer zallung awsgericht vnd ganntzlich gewertt, nach meinem pessten benügen vnd an allen meinen schaden, daran mich mein hawsfrawn, all vnnsser erbm woll benügt vnd furan zw ewigen zeitten benügen sollen. Alzo der mainung das wir, all vnnsser erben, noch annder yemanntts von vnnsern wegen itz noch hinfür darauff noch darnach deshalbm nimermer khainen zuspruch, recht, ansprach, worttung noch vordrung nicht mer haben gewinnen sollen noch wellen, weder mit recht noch an recht, geistlich noch welltlich, in dhainerlay weis angefär. Sew vnd all ir nachkomen mügen nun füran damit woll allen yern nütz vnd frwmbmen hanndlen vnd schikhen nach yerer notdurfft vnd fugsambkhait, selbs jnnhabm, vessnen, nützen, nüssen, versetzen, verkawffenn, schaffen, machen, gebm, wem vnd wie sew verlust vnd guet zimbt, als mit anderm des wirdigen gotzhaws zw Haslach aigenhafften guett, an vnnser, aller vnnsser erben vnd manigklichs von vnnssern wegen yrrung vnd einsprechen. Wir vnd all vnnsser erben sullen vnd wellenn des bestimbten zehennt vnd des kawffs yr vnd yerer nachkomen recht gwern vnd fürstanndt sein für all rechtlich ansprach mit dem rechten, so offt in das not beschiecht, als dann solhs kawffs, gwerschafft vnd freys aygen des lanndes Osterreich ob der Enns recht jst. Ging aber an solhem kawff vnd gwerschafft mit recht jcht ab, oder das jnn oder obenannten gotzhaws aingerlay krieg oder ansprach darjnn auferstünde, des sew schaden nämen, den selben schaden allen zw sambt dem hawbtguet globen wir in widerzekeren vnd wellen sy deshalben an allen schaden hallten. Es ist auch mer beredt, was wir brieff, geschrifft oder annders vber dy benanntten zehennt haben, dy sullen vnd wellen wir jnne mit sambt disem briff auch vber geben. Ob aber hinfür icht brieff fürgezogen würden, dy disem brieff schaden möchten bringen, dye selbigen brieff dy sullen ganntz krafftlos, töd vnd ab sein, vnd wider disen brieff kain krafft noch macht hinfür nicht haben. Mit vrkhundt des brieffs, den jch benanntter Schopper darumb gib, besigillten mit der ersamen, weisen N. richtter vnd ratte des margkts zw Haslach anhanngunden markht jnnsigill, darumb jch ir weishait inhallt ains pedtbrieffs mit vleys gebeten habe, doch in allen, iren nachkomen an allen schaden. Geschehen vnd geben an ertäg nach sanndt Thomans tag, des heiligen zwelfboten, als man schreibt nach der geburd Cristi fünfftzen hundert vnd sechssten jaren."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 563 (S 400), S. 634-635