"Ich Steffann Öllpekch(1), die zeit pfarer zu Reichennaw: Bekenn offennlich mit dem brieue für mich, all mein miterben vnd nachkumen vnd thue khundt allermenigklich, wo der fürkumbt, das ich dem erwirdigen hern Nicolas(2), brobst zum Schlegl vnd ||
seinem conuent daselben zu ires gotshaws notturfften gelyhen hab hundert pfundt pfening, die sy mir schuldig zethun gewesen; die weill ich aber vor augen hab das ewig leben jn disem zergenklichen mit gueten werchen zu erlanngen, so gib vnnd schaff ich die egemelt svma gelts dem bestymbten vnnser lieben frawen klosster zum Schlegl, dy der egemelt erwirdig her Nicolas brobst vnd sein conuent von mir eingenomen vnd enpfangen nun furbas sy vnnd ir nachkumen söllen vnnd mügen dy offt gemelt svma zu irs gotshaws notturfften jnnhaben, nützen vnd niessen, jrn frumen wol damit thun, wie sy verlusst, on mein vnd meiner miterben vnd nachkumen widersprechen, jrung vnd hindernüss, doch in söllicher maynung, das der egemelt brobst vnd conuent järlich mir zu meiner sel haill vnnd meinem geschlächt an sand Panthaleonstag vnnder der vigili mit einer collecten, des morgen mit einem gesunngen selambt jn sand Veits khapelln(3), auch mit zwayen gelesnen messen darunder, aine jn den ern vnnser frawen gelesen, trewlich verbracht vnd gehalten sollen werden. Es sol auch mein namen an dem tag meines absterbens jn den kalender vnnd mortilogium(4) bemelts klosters zu järlicher ewiger gedächtnüss eingeschriben werden, vnd zu allen gotsdiensten vnd hochtzeitlichen tägen vmb mein vnd meiner frundt sell auf der kanntzl gepeten werden an abganng vngeuer[?], darumb alles wie hie jnne verschribn ist, war vnnd stät zv halten. Auf sölhs gib ich egemelter Steffan Ölpekch dem offt gemelten hern Nicolas, brobst vnd conuent jn namen vnnser lieben frawen gotshaws zum Schlegl den brieue[?], besiglten mit des edlen vnd vessten Altman Perger(5) aufm Perg bey Rorbach, durch mein Steffan Ölpekch vleissiger gebete willen veruertigt, doch yme seinen erben vnd jnnsigel on schaden, darunnder ich mich mit meiner trewe an aydes stat verpinde, war vnnd stät ze halten jnnhalt des briefs. Der gebete vmb das jnnsigel sind zewgen her Michael Neindlinger(6) mein khaplan, her Hanns(7) pfarer zu sannd Oswold, Anndre Grueber(8) die zeit hoffrichter zum Schlegl. Der brieue ist geben am sambstag vor jubilate, nach Cristy vnnsers lieben hern geburd fünnftzehenn hundert vnd dernach jm zehenten jare etc."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 566 (S 403), S. 639-640