"Gratioso ac reverendo jn Cristo patri, domino Nicolao(1), preposito monasterij Plagensis, Premanstratensis ordinis, omnibus denique eiusdem monasterij professis, venerabilibus dominis presentibus et futuris ordinis seraphici patris nostri sancti Francisci, benefactoribus deuotissimis, frater Anshelmus(2) de Wyenna, eiusdem ordinis minimus ac jn provintia Austrie quo ad fratres regularis obseruancie minister, necnon reuerendissimi patris generalis ministri tocius ordinis jn provintia prefata commissarius inmeritus: Cum orationum suffragio salutari omnium incrementa virtutum, quamuis ex caritatis debito omnibus teneamur, jllis tamen longe amplius, quorum dilectionem certis benefitiorum inditijs frequencius experimur. Proinde vestre deuocionis sinceritatem attendens, quam ad nostrum et prefati patris nostri sancti Francisci geritis ordinem veluti veridica relatione agnoui dignum putaui et diuine acceptabile voluntati, vt ab ipso ordine prerogatiuam senciatis spiritualium gratiarum. Verum quia nudi temporalibus bonis caritatis vestre subsidijs dignam rependere vicem nequaquam temporaliter valemus, spiritualibus nihilominus beneficijs pro vt jn nostris apud Dominum Deum nostrum seruamus desiderijs compensare spiritualiter affectamus. Eapropter ego qui licet indignus curam fratrum de obseruancia jn prouincia prefata habeo generalem, vos supradictas personas ad confraternitatem(3) nostram et ad vniuersa et singula nostre religionis suffragia jn vita recipio pariter et jn morte plenam vobis participacionem omnium karismatum et spiritualium bonorum, videlicet missarum, oracionum, suffragiorum, officiorum diuinorum, jeiuniorum, abstinenciarum, disciplinarum, penitenciarum, peregrinacionum, jnspiracionum, predicacionum, lectionum, meditacionum, contemplacionum, obseruanciarum, deuocionum et omnium aliorum spiritualium bonorum tenore presentium graciose conferendo, que per fratres nostros jn provincia predicta degentes operari et acceptare dignabitur clemencia saluatoris. Addens insuper de dono et gracia singulari, quod cum diuine placuerit voluntati de exilio instantis miserie vos vocare, vesterque obitus multo annuente Domino tempore differendus nobis fuerit nunciatus. Jdem volo, vt pro vobis fiat officium, quod pro fratribus nostris defunctis annuatim ex more jn capitulo per totum ordinem fieri consweuit. Valeat feliciter vestra deuota et feruens caritas jn Cristo Ihesu Domino nostro in eternum. Amen. Ex loco nostro sancti Wolfgangi jn Pupping(4), anno Domini millesimo quingentesimo decimo octauo, die vero primo mensis januarij."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 572 (S 408), S. 645-646