"Nos Christophorus Numauis de Forliuio(1), diuina clemencia sacrosancte Romane ecclesie sancte Marie jn ara celi prebyter cardinalis, ac tocius ordinis sancti Francisci minister generalis: Venerabili Nicolao(2) preposito necnon religiosis fratribus suis tocius monasterij Plagensis, ordinis Premonstratensis, Patauiensis diocesis, ordinis seraphici patris nostri sancti Francisci, benefactoribus deuotissimis, salutem et pacem in Domino sempiternam. Quauis ex charitatis debito omnibus teneamur, jllis tamen longeamplius obligamur, quorum dilictionem [!] certis beneficiorum indicijs frequencius experimur. Proinde uestre deuocionis sinceritatem attendens, quam ad nostrum et prefati patris nostri sancti Francisci geritis ordinem velutj veridica relacione cognouj, dignum putaui et diuine acceptabile uoluntatj, vt ab ipso ordine prerogatiuam senciatis spiritualium graciarum. Verum quia nudi temporalibus bonis caritatis uestre subsidijs dignam rependere vicem nequaquam temporaliter valemus, spiritualibus nichilominus beneficijs prout in nostris aput Dominum Deum nostrum seruamus desiderijs compensare spiritualiter affectamus. Eapropter nos, qui curam fratrum minorum habemus generalem, vos supradictas personas, necnon et animas vestrorum defunctorum, ad confraternitatem(3) nostram et ad vniuersa et singula nostre religionis suffragia in vita recipimus pariter et in morte, plenam vobis participacionem omnium carismatum et spiritualium bonorum, videlicet missarum, oracionum, suffragiorum, officiorum diuinorum, jeiuniorum, abstinenciarum, disciplinarum, vigiliarum, penitenciarum, peregrinacionum, jnspiracionum, predicacionum, lectionum, meditacionum, contemplacionum, obseruanciarum, deuocionum et omnium aliorum spiritualium bonorum tenore presencium graciose conferendo, que per fratres tocius ordinis nostri et sancte Clare(4) sorores, ac per fratres et sorores tercij ordinis(5) vtriusque vbilibet per totum mundum degentes operarj et acceptare dignabitur clemencia saluatoris. Addentes insuper de dono et gracia singulari, quod cum diuine placuerit voluntatj, de exilio presentis miserie vos vocare, vesterque obitus multo annuente Domino tempore differendus nostro capitulo fuerit intimatus. Jdem volumus, vt pro uobis fiat officium et suffragia, que pro fratribus nostris defunctis recitata ibidem annuatim ex more per totum ordinem fieri consueuit. Valeat feliciter uestra deuota et feruens charitas jn Christo Ihesu Domino nostro. Datum in sacro conuentu sancti Bonauenture jn Lugdunum, tempore generalis congregacionis, die VII mensis julij, anno Domini millesimo quingentesimo decimo octauo."||
||
Eigenhändige Unterschrift: "Frater Christophorus, qui s[...] manu propria confirmat."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 573 (S 410), S. 646-647