"Wir Ferdinandus(1), von Gots gnaden printz in Hispanien, ertzhertzog zw Osterreich, hertzog zw Burgundy etc. Embieten vnnserm getreuen lieben Wolfganngen Jörger(2), vnnserm rate vnnd landshaubtman in vnnserm fürstennthumb Osterreich ob der Enns, vnnser gnad vnnd alles guet. Vnd fuegen dir zuwissen, das wir dem edeln, vnnserm lieben getreuen Ciriacus freyherrn zw Polhaim(3) vnnd Wartennberg, vnnsern rat, nufürohin zw vnnserm lanndshaubtman in bemelltem vnnserm fürstennthumb, so dw bisheer jnngehabt hast, ausgenomen vnnd jme dieselb vnnser haubtmanschafft mitsambt vnnserm sloss zw Lynntz(4), durich sich selbs oder ainen seinen verweser jnnzuhaben vnnd zuuerwesen beuolhen haben, jnnhalt vnnser brieff darüber ausganngen. Demnach emphelhen wir dir ernnstlich vnnd wellen, das dw dem gedachten, vnnserm rat Ciriacus freyherren zw Polhaim oder seinem verweser berurter vnnser hawbtmannschafft vnnd sloß Lynntz zw vnnsern hannden von stund an abtrettest, vnnd das mitsambt dem zeug vnd aller annder seiner zue vnnd eingehörung, so dir damit oder darnach eingeanntwurt worden ist, nichts ausgenomen, an vnnser stat eingebest vnnd vberanntwortest, vnnd das nit lassest noch damit vertziechest, vnnd so dw das gethan hast, sagen wir dich deiner pflicht, damit dw vnns deshalben verpundten bist, hiemit ledig, doch vorbehallten, ob dw vnns mit raittung icht dauon zw thain schuldig würdest. Das ist vnnser ernnstliche maynung. Geben in vnser stat Gratz, den fünftzechennden tag des monets octobris, anno etc. jm ainsund zwaintzigisten."||
||
Eigenhändige Unterschrift: "Ferdinandus"||
||
Rechts unten Sekretariats- und Registraturvermerke: "Ad mandatum serenissimi principis archiducis proprium." "Salamanca(5)." (und unleserliche Kürzel)

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 575, S. 648-649