"Ich Jobst von Oberweinmar(1), des durchleuchtigisten grosmechtigen fürsten vnnd ||
herrn, herrn Ferdinanden(2) printzen in Hispanien, ertzhertzogen zu Osterreich, hertzogen zu Burgundj, Steyer, Karndtn vnd Crain, meines genedigisten herrn phleger zum Valckhenstain: Bekenne das fur mich komen ist Bernhardt Peckh(3), burger zu Rorbach, als lehentrager des erwirdigen gotzhaws sanct Jacobs daselbst, vnnd bat mich mit vnnderthanigem vleis, jme an stat des bemelten gotzhaws die zwaj thail zehenndt aufm hoff zu Erlach(4), allen seinen rechtlichenn zugehorungen, jn Rorbeckher pharr gelegen, vonn wegen hochgedachter furstlicher durchleuchtigkait etc. der herrschafft Valckhenstain lehennschafft geruechte zuuerleyhen. Das ich vmb seiner vleissigen bete willen also gethan vnnd verlihen hab. Leyhe jm die auch hiemit wissentlich in crafft des brieffs, was jch jme zu recht daran verleyhen sol oder mag. Also das er an stat des merbemelten gotzhaws die obberuerten zwaj thail zehenndtn, seinen rechtlichen zugehorungen nu hinfuran in lehens weise muge jnnenhaben, nutzen vnnd niesen, auch in aller vordrung dauon gehorsam vnnd gewartig sein sol, als lehenns, lanndts Osterreich ob der Enns vnnd der herrschafft Valckhenstain recht ist. Es sollen auch solhe zwaj thail zehenndten, wann sy durch die herrschafft oder jne verwanndelt oder veranndert, widerumben zu lehenn genomen vnnd lehenns pflicht geben werden, vngeuerlich. Mit vrkundt des brieffs mit meinem anhanngenden jnnsigel besigelt, doch mir, meinen erben vnnd jnnsigel, auch der herrschafft Valckhenstain, vnnsrer lehennschafft, oberkaiten vnd vordrungen in albeg vnuergriffen vnd on schaden. Der geben ist am sonntag nach sanct Michels tag, nach Christi, vnnsers lieben herrn geburt funffzehen hundert vnnd jm sechsvndzwaintzigisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 588 (S 422), S. 661-662