"Ich Walthasar Öder zw Geczndorff(1): Bekhenne fur mich, mein bruedern(2) vnnd all vnnser erbenn mit dem offnen brief, das fur mich khumen jst der erber Steffann Zimmerman(3) zw Rorbach, vnnd bat mich mit diemitigen vleis, das jch jm als lehentrager an statt des wirdigen goczhaus vnnd pfarkhirchenn sand Jacob zw Rorbach den zehennt zway taill am Kreuczhoff(4) in Petringer pfarr mein vnnd meines bruedern lehenschafft gunstlichenn gerueche zw verleichenn. Das jch also gethan, angesehenn sein vleissig [gebet] vnnd jm den selbigen verlichen habe, verleich jm auch den hiemit wissentlich jn crafft ditzs briefs, was jch im zw recht daran verleichen soll oder mag, jn der beschaidenhaitt aber, das er als lehentrager bemelts gocshaws des heiligen zwelfpotten sandt Jacob zw Rorbach, oder ein ander, der nach jm zw einem lehentrager angeseczt wirtt, den obangezaigten zehennt mit seiner zwegehorunng von mir, meinen bruedern oder vnnsern erbenn jn rechtlehenns weis jnhabenn, nuczen, niessenn vnnd albeg neben anderen vnnseren lehenslewtten am dritten jar in die lehenstewr khumen, auch in andern vordrungenn dauon gehorsam vnnd gewertig sein sollen, als rechtlehens jm lannd Österreich ob der Enns recht jst, vngeuerlich. Mit vrkhundt des briefs mit meinem aigen anhanngunden jnsigl besiglt vnnd verfertigt, doch mir, meinen bruedern, allen vnnsern erbenn an vnnser lehenschafft, rechten vnnd vordrungenn vnuergriffentlich on schaden. Gebenn am montag nach Cantate, nach Christj vnnsers lieben herren gepurt tausent funffhundert vnnd jm neunundzwainczigistem jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 594 (S 426), S. 667