"Ich Georg von Ödt(1) zw Ernnegg: Bekhenne [das] fur mich alls den eltisten des namen von Ödt khomen ist der erber Steffan Zymerman(2) zw Rorbach, alls lehentrager des wirdigen gotshaus sanndt Jacob zw Rorbach, hiemit antzaigung, wie er von weyllenndt meinem vettern(3) salligen zway thayll zehenndt am Khreutzhof(4) in Petringer pharr gelegen zu rechtlehen gehabt vnnd vermugen aines lehennbriefs emphanngen hette. Batte mich gehorsames vleis, nachdem sych solicher zehennt von meines vettern salligen ableiben wegen widerumben lehen ze nemen geburet, jme denselben zuuerleihen geruechen. Weliches sein gehorsames bitten jch angesehen vnnd jme den berurtten zehennt mein vnnd meiner gebrueder(5) lehennschafft verlichen. Verleich jme den auch hiemit wissenntlich jn chrafft dits briefs, was jch jme zurecht daran verleihen soll, khan vnnd mag. Allso das er, sein nachkhomen, an stat berurts gotshaus die angereggten zehent, jrer zuegehorung nun furbaß von mir vnnd meinen gebruedern jn rechtlehens weis jnhaben, nutzen, niessen vnnd yeder geburlicher zeit den drittjarigen lehenndienst. Desgleichen, wann es sich, es sey durch den lehenherrn oder lehennsman vermanndt, die lehen nach gnaden raichen vnd emphahen, auch jn aller fordrung dauon gehorsam vnnd gewerttig sein sollen, wie dann rechtlehens vnnd lanndes Österreich ob der Enns recht ist, ongeuerde. Des zw vrkhundt, besiglt mit meinem aignen anhanngunden jnnsigl, doch mir, meinen erben an vnnser lehenschafft rechten vnnd aller fordrung vnuergriffen, vnnd dem jnnsigl an schaden. Geben zw Gecznndorff, am monntag vor Johannes Baptiste, jm funfftzehen hundert vnnd zwayvnndfunftzigisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 613 (S 439), S. 683-684