"Ich Georg von Ödt(1) zu Ernnegkh: Bekhenn fur mich alls den eltisten des namens vonn Ödt khomenn ist der erber Hannss Gartner(2), burger zu Rorbach, alls lehentrager des würdigen gotshauss sannt Jacob, hiemit annzaigung, wie das Steffan Zimerman(3) zu Gollerm, etwan lehenntrager des gemelten gotshauss, von weillenndt meinem vetern sälligern zwaytaill zehennt am Khreytzhoff(4), jnn Petringer pharr gelegen, zu rechtlehen gehabt vnnd vermug eines lehenbrieue empfanngen. Bate mich gehorsambs vleiss, nachdem sich solicher zehennt von meines vetern säligen ableiben wegen widerumben lehen ze nemenn geburt, jme denselben zuuerleihen geruechenn. Welches sein gehorsambs biten jch angesehen vnnd jme den beruerten zehennt mein vnnd meiner gebrueder(5) lehenschafft verleihen. Verleich jme den auch hiemit wissentlich in crafft ditz briefs, was jch jme zu recht daran verleihen sulle, khann vnnd mag. Also das er, sein nachkhumen, an stat beruerts gotshauss den anngeregten zehennt, seiner zu geherungen nun furbass von mir vnnd meinenn gebruedern jnn rechtlehens weyss jnnenhaben, nutzen vnnd niessen, vnnd jeder geburlicher zeit den dritt jarigen lehenndiennst. Desgleichen wann es sich, es sey durch den lehensherrn oder lehennsman vermanndt, die lehenn nach gnnaden raichen vnnd emphahen, auch in aller vordrungen daruon gehorsamb vnnd gewärtig sein solle, wie dann rechtlehenns vnnd lannds Österreich ob der Ennss recht ist, onne geuerde. Des zu vrkhundt, besiglt mit meinem aigen annhanngennden jnnsigl, doch mir, meinen erben an vnnsern lehenschafften rechten vnnd gerechtigkhaiten aller vordrungen vnuergriffen, vnnd dem jnnsigl an schaden. Gebenn zu Getzenndorff, dem vierzehenndten tag nouembris, nach vnnsers lieben herrn geburt Cristi, funffzehen hundert vnnd jm funffundfunffzigisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 615 (S 441), S. 685