"Ich Christoph Haimeran Herleinsperger(1) zu Pruckh(2) an der Ascha: Bekhen für mich, meinen bruedern Wolf Ernreich(3), auch meiner vettern Christophen(4) vnd Wolfen(5) der Herleinsperger säligen eheliche gelassne sune, all vnser erben offentlich [mit] disem brief, das für mich als dero zeit dem eltisten des stamen khumben ist der erbar Wolf(6), des Florian zu Hehenberg säligen gelassner sune, mit anzaigen, wie das er das ober güettl zu Hechenberg(7) jnhalt eines khauff brief von seinen geschwistreth völlig an sich bracht hette. Dieweil dann solches von dem namen vnd stamen der Herleinsperger zu lehen rürth, mich diemüetigclichen angerueffen, jme bemelts güetl zuuerleichen. Nun hab ich angesehen sein vleissig bitten vnd ihme vermelts güetl verlichen, leich ihme das auch hiemit wissentlichen in crafft des briefs, was ich ihme von rechten vnd lehen wegen verleihen sol, khan vnd mag. Also, das er soliches guet mag jnhaben, nuzen vnd nüessen nach aller notturfft, doch das alle handtlung vnd verwandlung mit vnserm willen vnd wissen beschech, anderst hiet es nit crafft, dauon anlait vnd ablait geben, vnd durchaus in allen sachen drey [!], gehorsamb vnd gewertig sein, wie ain getreuer lehenman, vnd landes ob der Enns recht ist. Auch wo sich durch die herrschafft ain verändrung begäb, widerumb zu lehen genumben vnd lehenspflicht gethon werden, ohn geuerde. Mit vrkhundte des prief mein, obgedachts Christophen Haimeran Herleinsperger zu Prugg an der Ascha, aigen anhangenden jnsigl verfertigt, doch mir, meinem bruedern, vnsern geuettern, allen vnsern erben an der lehenschafft aller obrigkhaiten vnuergriffen vnd an schaden. Geben den anderten tag juny, [nach] Christi vnsers heillandts geburde fünffzehen hundert vnd in dem sechs vnd funffzigisten jahre."||
||
[Postskript:] "Collat: gegen dem original vnd erfündt sich gleiches jnnhalts. Actum Linz, den 8 nouembris anno 1628. Leonhard Khapfer von Khapfenstain, landtschreiber."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 704, S. 766-767