"Von Gottes genaden. Wir Vrban(1) bischoue zue Passaw etc. Bekhennen, das wir vnnserm getreuen Georgen Khelhaimern(2), burgern zue Haslach, anstat vnnd zue hannden sanndt Niclas gotshaus daselbs zue Haslach, als desselben zechmaistern vnnd lehentragern, das guet in der Voraw(3) in Peurbegkher pfarr vnnd lanndtgericht, jtem vnnd das guet zue Hartmansdorff(4) in sanndt Peters pfarr vnnd Haslinger lanndtgericht gelegen, so von vnns vnnd vnnserm stifft Passaw zue lehen rüeren vnnd geen, zue rechtem lehen verlihen haben. Verleihen ime die auch mit allen iren zuegehörungen hiemit wissennlich vnnd in khrafft ditz briefs, was vnnd souill wir ime dann billich von lehen vnnd rechtens wegen daran verleihen sollen vnnd mügen. Darauf hat vnns er gewöndliche lehenßpflicht gethon vnnd an aidesstat gelobt, vnns vnnd vnnserm stifft Passaw getrew vnnd gewertig zu sein, vnnsern vnnd vnnsers stiffts fromen zu fürdern, schaden zu warnen vnnd zu wenden, vnnd die verschwigenen lehen, woe er deren wissen hete oder erfure, anzuzaigen, auch von den lehen so ime verlihen sindt geuerlichen nichts verändern oder entziehen ze lassen, noch ychtes one vnnser als lehenherrns wissen vnnd willen daraus zuuerkhomern, vnnd sich sonnsten in allen andern sachen ze halten als ain getreuer lehensman vnnd träger von solcher lehen wegen zu thun schuldig ist, ongeuerde. Zue vrkhundt diß brieffs, vnnder vnnserm anhangendem jnsigl. Geben in vnnser stat Passaw, freytags den siben zehenden monatstag aprilis, nach Christi vnnsers lieben herrn vnnd ainigen erlösers geburt funfftzehen hundert vnnd darnach in dem zwayvnndsechtzigisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 623 (S 449), S. 691-692