"Ego Wenceslaus, humilis Plagensium præpositus, vniuersis et singulis has præsentes lecturis uel audituris, salutem in Domino præcor. Dignum est eos quibus vitæ honestas ac probitas negociorum assiduitas et diligentia, actionum et priuatarum et publicarum experientia, operationumque variarum merita ac seruitiorum tandem fideliter et diligenter præstitorum ratio suffragantur, testimonijs claris et patentibus prosequi iuuare et comprobare. Quæ ita esse cum penes me non aliter constet: non potui sicut nec debui honestum et honoratum virum Stephanum Bruckmuller ciuem in oppido Aigen, et hoc elapso tempore iudicis officio fideliter functum, eius modi testimonio defraudare. Qui cum non tantum nunc sed ante aliquot annos omni diligentia et fidelitate in Aigen iudicem egerit, mihi submisse supplicauit ut cum suum officium ex more et consuetudine resignauerit, tali digno testimonio decoraretur. Ego uero eius desiderio et honestæ petitioni cupiens satisfacere, eidem tale testimonium gratiose concedo. Quare omnibus et singulis notum facio hoc præsenti chirogrpaho prænominatum virum Stephanum Bruckmuller se in hoc iudicis officio diligenter, fideliter et honorifice gessisse et honore quam promeritus est dignum nomine atque iudico. In quorum omnium fidem et testimonium præsentes has litteras conscribi et subscriptione ac sigillo meo communiri iussi. Datum 7. iulij anno 1589."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 671, S. 735-736