"Vertrags nottl zwischen dem würdigen herrn Hieronimus Cammerstockh(1), pfarrherrn zu Rorbach aines vnnd seinen zum pfarrhof aldort eingehörigen vnnd im verlofnen paurn aufstandt(2) beschwörtten vnderthonen andersthails, vber die einkhommen beschwärungs puncten durch die keyserlichen herrn commissarien geschlossen. - Freygelt von todfall. Jm todfällen der manspersonen allain solle gleich woll das ganze guet, ligundts vnd vahrundts, ordenlich jnuentiert vnnd in leidliche schätzung gebracht, yedoch nur allain das ligundte guth mitt zehendten pfenning verfreyt, hernach aber jn annembung desselben nichts mehr geraicht werden. - Freygeltt von kauff, wexl vnnd vbergab. Wan ausser des todtfals ein guth durch ob benante drey verwandlungen verändert würde, jst man der obrigkheit gleichfals den zehenden pfenning zu freygelt zeraichen schuldig. - Freygelt aus der obrigkhait, jtem von pupillen vnd heurath güttern. Diese drey freygelt seint hiemit allerdings cassiert vnnd auffgelöst, vnd sollen die vnderthonen deren khaines zu raichen schuldig sein. Es begäbe sich dan mit dem pupillen ein neuer todtfall. - Ehehaltställung. Die ehehalten sollen der obrigkheit denen keyserlichen publicierten generalis gemäß gegen gebürliche bestaldt: Vnnd vnnderhaltung vor amtern gelassen werden. - Robath. Die vnderthonen sollen gleichwol die bishero gebreichige robath laisten; doch aber, da ain oder der ander vorher vber vierzehen tag gerobath, hinfuro darüber nit angestrengt werden, jnmassen sich dan herr pfarrher dits orts beschaidlich zuuerhalten, vnd da in künftig jr keyserliche majestät sich einer durchgehenden ordnung resoluiern wurdte, als dan der selber nach zugeleben wissen wirdt. - Schließlichen ist zwar in dieser commissionshandlung geschlossen worden, daß sowohl denen vnnderthonen als herrschafften gleich lauttente verträg vnder aller herrn commissarien aigner handschrifften vnd petschafften aufgericht vnd zugestölt werden sollen. Weillen aber solches von jener keyserlichen mayestät allergenedigst ratification nit beschehen khan, so sein vnder dessen beeden thaillen diese mit etlicher der wolermelten herrn commissarien aignen handschrifften vnderzaichnete vidimierte abschrifften zu jerer nachrichtung hinauszugeben verwilligt worden. Actum Lyntz, den dreyzehenden may, anno achtvndneintzig." ||
||
Unterschriften: "Paulus Gartzweiler D. / A. V. Altenstaig. / Hannss Ruprecht Hegemüller. / Raphael Fraunholz m. propria." (Lesung unsicher!)

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 679 (S 488), S. 743