Anno domini M^o. CC^o. LXV^o. indictione octaua quinto kal. Septembris acta sunt hec coram nobis Arnoldo preposito ordinis sancti Benedicti de Brunna et decano Medlicensi subdelegatis iudicibus delegatorum sedis apostolice, videlicet abbatis sancte Crucis ordinis Cysterciensis et decani Znoymensis Patauiensis et Olmocensis diocesum, quorum mandatum prius recepimus in hec uerba. Venerabili uiro ac in Christo patri domino Arnoldo dei patientia preposito sancti Benedicti in Brunna Olmocensis diocesis ordinis sancti Benedicti Henricus permissione diuina abbas sancte Crucis Cysterciensis ordinis Patauiensis diocesis orationes in domino sempiternas. Noueritis, nos litteras domini pape recepisse in hec uerba. “Clemens episcopus seruus seruorum dei dilectis filiis abbati sancte Crucis Cysterciensis et preposito sancti Ipoliti sancti Augustini ordinum et decano Znoymensi ecclesiarum Patauiensis et Olmocensis diocesum salutem et apostolicam benedictionem. Dilecti filii abbas et conuentus monasterii sancte Marie Scotorum ordinis sancti Benedicti Patauiensis diocesis nobis significare curarunt, quod olim inter ipsos ex parte una et magistrum G. plebanum plebis in Vienna predicte diocesis ex altera super iuribus parrochialibus in Lauben et quibusdam aliis capellis ad eosdem abbatem et conuentum spectantibus, nec non super quibusdam aliis iuribus ac decimis tam ad monasterium ipsum quam ad easdem Capellas pertinentibus materia questionis exorta fuit, tandem a partibus in venerabilem fratrem nostrum Patauiensem episcopum loci diocesanum super premissis tanquam in arbitrum sub certa pena concorditer conpromissum, qui super hiis quondam arbitrium promulgauit, quod redundat in predicti monasterii et capellarum ipsarum lesionem enormem. Quare dicti abbas et conuentus nobis suplicarunt, ut eis ac monasterio et capellis predietis prouidere per beneficium restitutionis in integrum curaremus. Quo circa discretioni uestre per apostolica scripta mandamus, quatenus vocatis, qui fuerint euocandi, si ubi constiterint, prefatum monasterium et capellas easdem ex predictis enormem sustinere iacturam, supradictis abbate, conuentu ac ipsius monasterio et capellis aduersus ea, sicut iustum fuerit, in integrum restitutis, audiatis hinc inde proposita et, quod iustum fuerit, appelatione postposita decernatis, facientes, quod decreueritis, per censuram ecclesiasticam firmiter obseruari. Testes autem, qui fuerint nominati, si se gratia, odio uel timore subtraxerint, per censuram eandem appelatione cessante cogatis ueritati testimonium perhibere. Quod si non omnes hiis exequendis poteritis interesse, duo uestrum ea nichilominus exequentur. Datum Perusii quinto kalendas Aprilis, ponti ficatus nostri anno primo.” Verum quia nos variis et arduis ecclesie nostre negotiis multipliciter prepediti, huic cause interesse non possumus, vices nostras in solidum uobis in hac parte committimus terminandas, ratum habentes atque gratum, quicquid per uos in dicta causa factum fuerit et ordinatum. Datum in monasterio nostro anno domini M^o. CC^o. LXV^o. vndecimo kalendas Julii. - Venerabili viro et discreto domino D. permissione diuina decano Medlicensi prope Wiennam H. nutu diuino decanus Znoymensis, delegatus domini pape, Olmocensis diocesis orationes in domino sempiternas. Noueritis, nos litteras summi pontificis non abolitas, non cancellatas nec in aliquo uiciatas in hec uerba recepisse. “Clemens episcopus etc ut supra" (sic). Verurn quia nos tam ecclesie nostre quam etiam aduocati nostri negociis multipliciter prepediti, huic cause interesse non possumus, vices nostras in solidum in hac parte uobis committimus terminandas, ratum habentes et gratum, quicquid per uos in dicta causa fuerit ordinatum et, quia sigillo nostro hac uice caruimus, presentem litteram sigillo cardiani et fratrum minorum de noua domo decreuimus sigillandam. Datum in noua domo anno domini M^o. CC^o. LXV^o. in die sancti Kyliani .- Preposito vero sancti Ipoliti ecclesie sue negociis impedito interesse non ualente, quod per litteras subdelegationis eius potest constare, quarum tenor talis est. ,,Honorabili uiro et discreto domino . . dei nutu decano Znoymensi Olmocensis diocesis H. dei gratis sancti Ipoliti prepositus ordinis sancti Augustini Patauiensis diocesis orationes in domino sempiternas. Noueritis, nos litteras domini pape non abolitas, non cancellatas nec in aliquo uiciatas, sed inomni parte saluas in hec uerba recepisse. “Clemens episcopus etc.ut supra.” (sic) Verum quia nos debilitate corporis arduisque et uariis ecclesie nostre negociis tam multipliciter prepediti, huic cause interesse non possumus, uices nostras in hac parte uobis committimus in solidum terminandas, ratum et gratum habentes, quicquid uos in dicta causa ordinandum duxeritis et statuendum. Datum in monasterio nostro apud sanctum Ipolitum in vigilia sancti Johannis Baptiste anno domini M^o. CC^o. LXV^o. - Nos predictum magistrum Ger. peremptorie citauimus apud Wiennam ad domum fratrum predicatorum predictis abbati et conuentui responsurum, cuius citationis tenor talis est. Nos Arnoldus permissione diuina prepositus sancti Benedicti de Brunna nec non D. decanus Medlicensis prope Wiennam, subdelegati venerabilium virorum videlicet abbatis sancte crucis ordinis Cysterciensis et decani Znoymensis delagotorum domini pape, prouido uiro et discreto magistro G. plebano Wiennensi salutem et orationes in Christo. Noueritis, nos litteras honorabilium uirorum scilicet abbatis sancte Crucis et decani Znoymensis Patauiensis et Olmocensis diocesum, in quibus nobis uices suas in solidum commiserunt, ut per ipsas litteras aperte declaratur, recepisse, mandatum domini pape in hec uerba continentes. “Clemens episcopus etc. ut supra” (sic). Auctoritate igitur nobis in hac parte commissa peremptorie uos citamus ad instantiam predictorum abbatis et conuentus, ut coram nobis Wienne in ecclesia predicatorum proxima feria sexta post festum sancti Bartolomei apostoli compareatis, auditurus et facturus, quicquid decreuerit ordo iuris. Qui dies si feriatus fuerit, diem nichilominus proximum sequentem non feriatum pro peremptorio uobis assignamus, et siue illo die ueneritis siue non, nos tamen, quantum de iure fuerit, in causa procedemus, et quia nos A. memoratus sigilli nostri copiam ad presens non habuimus, presentem litteram sigillo prioris et fratrum predicatorum de Brunna decreuimus communiri. Datum in vigilia sancte Margarete anno domini M^o. CC^o. LXV^o. - Quo die partibus comparentibus coram nobis ac predicto magistro Ger. diuersis allegationibus uolente iudicium declinare, parte vero altera insistente, ut in iudicio procederemus, petiuimus a partibus, ut nobis assessores assignarent et tabelliones. Pars domini abbatis dedit nobis pro assessore magistrum D. canonicum ecclesie sancte Marie de Wolframskyrichun Olmocensis diocesis, pars autem domini plebani nullum nobis assignare uoluit pro assessore, sepius tamen requisitus nec similiter tabellionem aliquem nobis nominare uolebat. Tandem post longas disputationes habito maturo consilio dominum Conradum plebanum de Hurbn consentientibus partibus nobis elegimus in assessorem, de quorum consilio sic interlocuti fuimus, quod, ex quo facta est nobis fides de littera papali et de subdelegationibus nobis factis, quod iudices eramus et in negocio procederemus, donec contrarium probaretur, et tunc continnauimus diem sequentem, ut magister G. die sequenti proxima hora prime in eodem loco exceptiones, quas proposuerat coram nobis, tam in personas nostras quam rescripti apostolici (sic) et in personam actoris seu alias omnes dilatorias exceptiones nobis in scriptis assignaret, ut ex hoc tam nobis quam parti aduerse ad deliberandum, replicandum nobisque sane interloquendum copia preberetur; quam prorogationem diei secundum ea, que dicta sunt superius, statuimus de consensu magistri Detrici, aduocati sui, eo die in causa predicta. Die uero sequenti partibus comparentibus coram nobis, petiit pars abbatis et conuentus exceptionum propositarum copiam sibi fieri et in scriptis, sicut conuentum fuit et interlocutum a nobis, assignari, vt ad eas secundum iuris ordinem responderet, nosque deliberare possemus, an exceptionibus uel replicationibus stare deberemus. Cum autem in scriptis nobis exceptiones assignare deberet, ipse in uocem cuiusdam appellationis prorupit, appellationes cum instantia postulando, et sic illicentiatus contra prohibitionem nostram recessit a iudicio, copiam appellationis negans nobis exhibere, a nobis tamen sepius requisitus. Nos autem ad conuincendam ipsius malitiam habito consilio assessorum nostrorum, ut iuris ordinem per omnia seruaremus, per uiros prouidos presbyteros, dominum Leonem de sancta Maria in littore et dominum Conradum dictum Paratul, uocauimus ad capellam domini regis ducis Austrie in ciuitate Wiennensi statim post horam nonam eiusdem diei, ut copiam appellationis sue emisse nobis faceret, ex qua deliberare possemus, sub qua forma appellationes, quas petierat, concedere deberemus ac possemus colligere, utrum eidem appellationi tanquam legitime defferre uel tanquam friuolam reputare deberemus. Quod nullatenus facere pars magistri Ger. cvrabat. Tunc post horam nonam comparente parte domini abbatis, parte domini plebani contumaciter se absentante, idem abbas petiit, ut in negotio procederemus, dominum plebanum propter suam contumaciam puniendo, et de proborum uirorum consilio nobis assidentium dominum abbatem misimus in possessionem causa rei seruande petitarum rerum, et rebelles et contradictores excommunicauimus in nomine patris et filii et spiritus sancti. Tenor vero sententie nostre talis est. (Folgt die unmittelbar vorhergehende Urkunde Nr. XL). Et hec omnia fecimus conscribi per Henricum de Tulbing et Nicolaum Hungarum apud acta pro tabellionibus iuratos de utriusque partis consensu, licet ab initio magister Ger. in eos tanquam in tabelliones nequaquam uoluit consentire.

Source Fulltext: HAUSWIRTH, Schotten (=FRA II/18, 1859) S. 49-53