Johannes miseracione diuina Tusculanus episcopus, apostolice sedis legatus, religiosis uiris dilectis nobis in Christo . . abbati et conuentui monasterii sancte Marie Scotorum in Wienna ad Romanam ecclesiam, ut dicitur, nullo medio pertinentis ordinis sancti Benedicti Patauiensis dyocesis salutem in domino. Vt pulcra et decora filia Jerusalem fidelibus et infidelibus terribilis appareat, ut castrorum acies ordinata ecclesia militans uariis insignitur titulis dignitatum, per quas tamquam ornata monilibus et circumamicta varietate venustatem prefert morum illustrium ecclesie triumphantis, et quod tandem in re habebit, in spe gerere se ostendens veritatem indicat per figuram. Quare nos ecclesiam vestram honoribus insignibus ornare volentes, ut ornata se tanto diligentius immaculatam studeat conseruare, quanto propensius tenetur diligere decus proprium et decorem,vestris precibus inclinati, usum mitre et anuli aliorumque pontificalium tibi . . abbas et successoribus tuis in perpetuum auctoritate, qua fungimur, duximus concedendum.||
Nulli ergo omnino hominum liceat, hanc paginam nostre collationis, prouisionis, inuestiture, reseruartionis, inhibitionis et constitutionis infringere uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum Herpiboli XIIII. kalendas Aprilis, pontificatus domini Honorii pape IIII^ti anno secundo.

Source Fulltext: HAUSWIRTH, Schotten (=FRA II/18, 1859) S. 74-75