Ich Herman von Ladendorf vnd mein Housurowe fuer Geysel veriechen vnd tuen chvnt allen den, die den brief lesent oder hoerent lesen, die nv lebent vnd hernach chvmftich sint, daz wir mit veraintem Rat ein lechen datze Ladendorf vnsers aygens, daz wir mit gesampter hant gechaufet haben wider den Lachsendorfer, haben hin gegeben Perthtolden Peltzleines svn ledichleichen, also beschaiden, daz wir div aigenshaft ovf gegeben haben vnser vrowen datz den Schotten an alle arge liste, daz Perchtold der vor genant Dreisich phenninge dienen schol Hintz vnser vrowen hintz den Schotten Datz Wiennen von dem selben Lechen, vnd haben ovch gelv^ept, Ich Herman vnd mein Hovsvrowe ver Geysel vnd alle vnser Erben, rechten Scherm als Landes recht ist, vnd Rechtes aigens vnuerschaidenleichen, swaz an ainem vnder vns abge, daz daz ander an dem selben Scherm leste. Daz disev redde stet sei vnd ovch ditz gelube vntzebrochen beleibe, daz bestetige wir mit vnserm insigel vnd mit den gezivgen, di hernach gesriben stent. Dez ersten Her Dietreich von Chirchlinge vnser Ov^echem vnd Her Dietreich mein Prveder, Die ire insigel ovch an disem brief legent, vnd ander gezivge die bei der redde vnd bei dem gelube gewesen sint. Her Gebhart vnser Reitter, Her Hainreich der Chelner, Her Weigant, Her Havch, Her Go^etfrid der Jeger, Her Starchant der Richter von Gavnestorf, Her Fridreich der Herren Amman von den Schotten, Levpolt vnd Chv^enrad von Nv^ernberch, Otto, Pittrolf, Meinhart der amman, Perchtold der alt amman vnd ander bider levt vil. Diser brief ist gegeben, do von Christes gebv^ert ist gewesen Tovsent Iar zwai Hvndert jar vnd drev vnd Nevntzich Iar, an Sand Nycolas tach.

Source Fulltext: HAUSWIRTH, Schotten (=FRA II/18, 1859) S. 88-89