Nos Wernhardus dei gracia ecclesie Patauiensis episcopus tenore confitemur presencium, quod, cum ex iustis causis Ditricum de Stadelov, cuius ecclesie ius patronatus ad nos spectat, et Nycolaum de Pulka plebanos, cuius ecclesie ius patronatus ad venerabilem abbatem et conuentum monasterii Scotorum in Wienna dinoscitur pertinere, in ecclesiis premissis transtulissemus eo, quod alter eorum in alterius ecclesia plus posset proficere saluti animarum quam in sua, et ad translationem huiusmodi predicti abbas et conuentus suum attribuissent consensum, ne ex hoc premisse ecclesie Scotorum in priuilegiis suis, ex quibus abbati et conuentui conpetit post proximam vacacionem ecclesie in Pulka fructus eiusdem ecclesie ad mensam suam recipere eandemque ecclesiam per monachos suos in spiritualibus et temporalibus gubernare, aliquomodo derogetur, ipsis cauemus auctoritate presencium, volentes eadem priuilegia sev gracias per nos et capitulum nostrum indultas in suo robore in omnibus suis clausulis inuiolabiliter et perpetuo perdurare, que nichilominus ex nunc innouamus eisdem et de certa sciencia ordinaria auctoritate confirmamus, inhibentes predicto Ditrico, vt ad aliquam permutacionem cum alia ecclesia in posterum nulla racione procedat. In cuius rei testimonium presentes dedimus litteras nostro sigillo munitas. Datum et actum Wienne in ecclesia Scotorum anno domini M^o. CC^o. Nonag^o. quinto, in ascensione domini.

Source Fulltext: HAUSWIRTH, Schotten (=FRA II/18, 1859) S. 91