Ich Otto der Junge von Liehtenstain tu^on chunt vnd vergib allen den, die disen brief sehent oder ho^erent lesen, die nu sint oder noch chvmftich werdent, daz ich die waide ze Stainowe, dev mich aigenleichen angeho^eret, lazen han den leuten datz dem Hippleis, die zv^o vnser vrowen Gotshouse geho^erent hintz den Schotten ze Wienn, vnd sulen iaerkleich davon dienen ein halbez phunt wienner phenning, halbe ze sand Georin tage, halbe ze weihnahten. Vnd swer meine erben nah mir chumftich sint, die sulen niht mer dienstes mu^oten, wan als vor geschriben ist, vnd sulen auch die selben erben mit sampt mir die vorgenante leute vmbeswaret lazen vnd niht mer mu^oten von in, wan ze anlait vnd ze ablait zwelf phenninge. Dar vber, daz daz stete sei, gib ich disen brief mit meinem Insigel ze vrchv^ende, vnd ist geschehen ze Wienn nach Christes geburt Tousent zwaihundert iar in dem Nevndem vnd Nevnzigistem Iare, des Suntages an sand Andreas tage.

Source Fulltext: HAUSWIRTH, Schotten (=FRA II/18, 1859) S. 101