Ich Chvnrat der priester, zv den Zeiten maister der purger spital zv Wien, vnd ich Levpolt avf der Sevl, zu den Zeiten verweser desselben spitals, wir veriehen vnd tvn kvnt allen den, die disen brief sehent oder horent lesen, die nv lebent oder hernach kvnftich sint, daz die erber vrowe vro geisle, hern Trutmannes tohter vor Kerner purgetor, dem got gnade, mit gesamenter hant ir kinde, Chvnrades ir svnes vnd ir To^ehtere Margreten, perhten, alheite vnd Chvnigvnde, vnd mit willen vnd gvnst ir aideme Lvpoldes vnd Chvnrades vnd mit vnser haut verkavft het avf ir weingarten innerhalb der Wien, hinder der pvrger spital sehs phvnt wienner phenninge geltes pvrchrehtes vmb drev vnd fvnfzich phvnt wienner phenninge , der sie rehte vnd redeliche gewert ist, dem erbern priester hern Helmweige, dem Capplan zv sant pangrezen, zv verchovfen, zv versezzen oder dvrch seiner sele willen ze gebene swem er wolde, als er noch besvnderliche brive vnd insigel darvber hat. Darnach do daz geschah, do moht die vrowe vro geisel daz vorgesprochene pvrchrech von dem egenanten weingarten niht gedinen zv den tagen, als sie ze rehte solde, vnd versaz dazselbe pvrchreht in das ander iar, daz sein aht phvnt werden. Do clagete der vorgenante her Helmwich avf den vorgesprochen weingarten vmb sein pvrchreht, daz im versezzen waz, des gabe wir hern Helmwigen vnd der vrowen vro geislen einen genanten tag fvr vns. Do chom vro geisle mit ir Kinden, mit ir aidemen vnd mit andern frvmen Levten fvr vns vnd iach, daz sie des pvrchrehtes von dem weingarten nith gedienen mohte, vnd pat vns fleisecliche, daz wir ir hvlfen ze bitene hern Helmwigen, daz er den vorgenanten weingarten mit der hovestat, die derzv gehoret, halben neme fvr fvnf phvnt gvlte pvrchrehtes vnd fvr aht phvnt phenninge purchrehtes, die im versezzen waren, vnd daz man im daz sehste phvnt geltes pvrchrehtes diente von dem andern teile des weingarten vnd der hovestat zv drin zeiten in dem iare, an sant Michahelis tag ahtzich phenninge, zv weihenahten ahtzich, an Sant Jo^ergen tag ahtzig, mit allem dem reht, als man an der pvrchreht hie zv Wien dinet. Des bote wir vnd ander frvme Levte mit fleize hern Helmwigen, daz er vns dez gewert. Daz hat er getan dvrch got vnd durch vnser liebe vnd dvrch vnser bete, vnd hat den vorgenanten halben weingarten vnd die halben hovestat avfgenomen vnd enphangen von vnser hant fvr die fvnf phvnt geltes pvrchrecht vnd fvr die aht phvnt phenninge, die im versezzen waren also, daz er damit allen seinen frvmen schaffe, als iz im wol chv^em vnd fv^ege, vnd daz eine phvnt geltes pvrchrehtes sol man im dienen zv den tagen vnd zv dem reht, als vor gescriben ist, also mit avzgenomener rede, swen daz ist, daz man im ein ander phvnt geltes pvrchrehtes geit, daz als gv^et ist, daz sol er nemen, vnd sol daz phvnt geltes auf dem halben weingarten ledich sein. Vnd darvber dvrch pezzer sicherheit so habent sich gesatz die vorgenant vrowe vro geisle vnd ir svn Chvnrat vnd ander ir kint vnd ir aideme Lvpolt vnd Chvnrat dem vorgenanten herren hern Helmwige vber den vorgesprochenen halben weingarten vnd vber die halben Hovestat vnd vber daz phvnt geltes purchrehtes zv rehtem scherm fv^er sich selben vnd fvr Otten der fro geislen svn, der zv den zeiten inner Landes nith was, vnd fvr ander ir erben vnd fvr alle ansprache, als pvrchrehtes reht ist vnd der stat gewonheit zv Wien. Daz dise sache stete bleibe vnd hernach nith gekrenket mvge werden, darvber gebe wir disen brief versigelt mit des spitals insigel vnd mit hern Chvnrats von Praitenvelde insigel, der pei diser Sache verihtvnge ist gewesen. Des sint gezevch Her Gerhart der pharrer zv Sand Oswalde, Her Hainrich der pharrer zv Sant Margreten, Her Hainrich der priester hern Reimbotes svn, der erber ritter her Hainrich von praitenvelde. Her Ortolf der Statscriber. Her Chvnrat der grv^enewald, Her Rudger hern altmannes svn vor Sant Stephan, Her Hainrich der hantfeste schriber, Her Vlrich der Nuzdorfer, der Reisenperger, Her Chunrat der vinke vnd ander frv^eme levte gnv^ech. Dirre brief ist gegeben, do von Christes vnsers herren gebv^erte ergangen waren drevzehen hvndert iar vnd darnach in dem ersten iare.

Source Fulltext: HAUSWIRTH, Schotten (=FRA II/18, 1859) S. 102-104