Ich Poppe von Liebenberch vnd ich Engelpreht sein prvder wir veriehen vnd tvn chvnt allen den, die disen prief lesent oder horent lesen, die nv lebent vnd hernach chvnftich werdent, daz wir mit vnser erben gvten willen vnd gvnst vnd mit gesamter hant vnd avch zu der zeit, do wir iz wol getvn mohten, verchavft haben vnsers rehten aigens sibin schillinge wienner phenninge geltes avf ainem halben Lehen da ze Erpvrch mit allem dem nvtz vnd reht, als wir sie in áigens gewer her praht haben, vmb ains min zwenzich phvnt wienner phenninge, der wir reht vnd redlichen gewert sein, dem erbaern herren apt Wilhalme vnd der Samnvnge gemaine des Gotshavses vnser vrowen vnd der Schotten da ze wienne ledichlichen vreilichen vnd ewichlichen ze haben vnd allen irn frvmen da mit ze schaffen, verchavfen, versetzen vnd geben, swem sie wellen an allen irresal. Vnd sein avch wir, ich Poppe von Liebenberch vnd ich Engelpreht sein prvder, der vorgenanten Sibin schillinge geltes avf dem halben Lehen da ze Erpvrch vnsers herren apt Wilhalmes vnd der Samnvnge gemaine des Gotshavses vnser vrowen vnd der Schotten da ze wienne rehter gewer vnd scherm fvr alle ansprache, als aigens reht ist vnd des landes gewonhait ze Osterreich. Vnd geben in darvber disen prief ze ainem sihtigen vrchvnde vnd ze ainem offen gezivge vnd ze ainer ewigen vestnvnge dieser sache versigilten mit vnser paider Insigiln. Vnd sint avch des gezivg her Herman der Marschalck von Landenberch , Maister Perhtolt der Obriste schreiber herzogen Rvdolfes von Osterreich, her Vlrich von Wolf-gerstorf vnd her Albreht der Stvchse von Travtmannestorf, die ze den zeiten lant Rihter waren in Osterreich vnd ander frvme levte genvch. Diser prief ist geben ze Wienne des naehisten Mittichens nah dem Perhtage, do von Christes gebvrt waren ergangen Tavsent Iar drev hvndert Iar in dem Ersten Iare darnah.

Source Fulltext: HAUSWIRTH, Schotten (=FRA II/18, 1859) S. 101-102