Ich Hainreich Walich der aderlazzer, purger ze Wienne, vnd ich percht, sein Housvrowe, veriehen vnd tv^on chvnt allen den, die disen brief lesent oder ho^erent lesen, daz wir mit vnser Erben gu^etem willen vnd gvnst, mit verdahtem mv^ot vnd mit gesamenter hant, zu der zeit, do wir iz wol getu^on mohten, vnd mit vnsers Grvntherren hant, hern Albrehts, der zv den zeiten Chappelan vnd verweser was der Chappellen in des Herzogen purch ze Wienn, verchovft haben ein phunt geltes wienner pfenning auf vnserm Hovs, daz da leit in der Cherner strazze, vmb zeben pfvnt wienner pfenning, der wir gar vnd reht gewert sein, dem Erbern manne Seifriden dem Swertfurben vnd seiner Housvrowen, vron Gedravten, ledichleichen vnd vreileich ze haben vnd allen irn frumen damit ze schaffen, als iz in wol chom vnd fuege. Die habent dazselb pfunt Geltes gegeben ze rehtem widerwechsel der Chappellen ze sant Pangraetien, die da leit auf des Hertzogen Hof ze Wienne, für ein pfunt geltes, daz in an den zwelf Schilling Geltes abgeschlagen ist, die si dienten ze pu^orchreht hintz Sand Pangracien von ir Hovs, daz da leit in sand Johans Strazze, vnd sullen ovch wir, oder swer daz vorgenant vnser Hovs nach vns besitzet, daz vorgesprochen pfunt Geltes davon dienen hintz Sand Pangracien ze drin zeiten in dem Jare mit allem dem Reht, als man an der Pu^orchreht hie ze Wienne dient, achzich pfenning an Sand Jorgen tage, achzich pfenning an Sand Mychels tage vnd achzich pfenning ze weichnahten, also auzgenomenchleich, swann daz ist, daz wir ein ander pfunt Geltes hintz Sand Pangracien gechouffen innerthalb der Purchmawer ze Wienn, daz als gu^ot ist, so sol vnser Hovs des pfunt Geltes von Sand Pangracien Chapellen ledich sein in allem dem Reht, als iz vor gewesen ist. Ich Albreht, der Chapplan vnd verweser der Chapellen in des Hertzogen Pu^orch ze Wienne, vergich, vnd gesten alles des, daz an disem brief geschriben stet, daz daz geschehen ist mit vnserr gvnst vnd mit vnserr hant, vnd geben darvber ze einem offenn v^erchv^end vnd zv einer ewigen stetichait vnser Insigel an disen brief gehangen, vnd sint ouch des Gezevg her Helmweich, der ê Chapplan was ze Sand Pangracien, her Gerhart, her Hainrich, her Perchtram vnd her Dietreich die priester, her Chunrat der witze, her Chunrat der Perchmaister, Rueger von Regenspurch vnd Ott vnd ander ersamer laeut genu^och. Ditz ist geschehen vnd ist diser brief gegeben ze Wienn, do von Christes gebu^ort warn ergangen Tousent iar drev Hvndert Iar darnach in dem Sibenten Iar, des vreytags in den ersten vier tagen in der vasten.

Source Fulltext: HAUSWIRTH, Schotten (=FRA II/18, 1859) S. 120-121