Ich Hainrich, des Praitenvelder Schreiber, vnd ich Gerdravt, sein havsvrowe, wir veriehen vnd tvn chvnt allen den, die disen prief lesent oder horent lesen, die nv lebent vnd hernach chvnftich sint, daz wir mit vnser erben gvtem willen vnd gvnst vnd mit gesamter hant zv der zeit, do wir iz wol getvn mohten, verchavft haben vnserm Grvntherren maister Chvnraden von Lintz, der zv den zeiten Schreiber was des hohen fvrsten Herzogen Fridriches von Osterreiche vnd Chapplan vnd verweser der Chappellen sand Pangracien, die da leit avf des Herzogen Hove ze Wienne, ain phvnt wienner phenninge geltes pvrchrehtes avf vnserm gamavertem Havse, daz da leit hinder der vorgenanten Chappellen sand Pangracien, vmb zehen phvnt wienner phenninge, der wir reht vnd redlichen gewert sein, also mit avzgenomner rede, swanne daz ist, daz wir, ich Hainrich der Schreiber vnd ich Gerdravt sein havsvrowe oder vnser erben, ob wir niht en sein, geben dem vorgenanten maister Chvnraden von Lintz oder deme, der der vorgenanten Chappellen sand Pangracien Chapplan ist, vnd avch derselben Chappellen ain ander phvnt wienner phenninge geltes pvrchrehtes innerhalben der Ringmavre ze Wienne, daz ir also mezzich ist, als daz phvnt geltes avf vnserm havse, so svln wir vnd vnser havs des phvndes geltes fvrbaz von in ledich sein, vnd svln vns disen prief wider geben an alle Widerrede. Die weile aber des niht geschiht, so svln wir, oder swer das vorgenant vnser gemavrtes Havs nah vns besitzzet, dazselbe phvnt geltes pvrchrehtes von dem vorgesprochen Havse dienen dem vorgenanten maister Chvnraden von Lintz oder deme, der der eegenanten Chappellen sand Pangracien Chapplan ist, vnd avch derselben Chapellen ze drien Zeiten in dem Jare, achzich phenninge an sand Jorgen tage, achzich phenninge an sand Michels tage vnd achzich phenninge ze weihenahten, mit allem dem reht, als man an der pvrchreht hie ze Wienne dient. Vnd wand wir, ich Hainrich der Schreiber vnd ich Gerdravt sein hausvrowe, selbe niht aigens Insigils haben, vnd wand der vorgenant maister Chvnrat von Lintz des vorgesprochen vnsers havses stifter vnd stoerer ist, davon so haben wir Im vnd der vorgenanten Chappellen sand Pangratien geben disen prief ze ainem sihtigem vrchvnde vnd ze ainem offen gezevge vnd ze ainer ewigen vestnvnge diser sache versigilten mit sein selbes Insigil vnd mit hern Helmwiges Insigil, der ze den zeiten verweser was der chirchen sand Michels ze wienne, der diser Sache gezevg ist mit seinem Insigil, vnd sint avch des gezevg her Gerhart, her Dietrich, her Hainrich vnd her Perhtram die priester, her Chvnrat der witzze, Starchant der Schoberl, Seibot der Heftler, maister Vlrich der pogner, Elbel der pogner sein gesweie, Hainrich daz vmpilde, Ludweig der Schilter, Johan der Gokler vnd ander frvrne levte genvch, den dise sache wol chvnt ist. Diser prief ist geben ze wienne, do von Christes gebvrt waren ergangen drevzehen Hvndert iar In dem Sibenten lare darnah, an sand Peters tage, als er avf den Stv^ol ze Rome gesatz wart.

Source Fulltext: HAUSWIRTH, Schotten (=FRA II/18, 1859) S. 120-121