Ich Vlreich vnd ich Christein sein Housvrowe, gesezzen in des Chraftes hof ze Wienne, der da leit in der Walichstrazze, wir veriehen vnd tun chunt allen laeuten, die disen brief sehent oder horent lesen, daz wir mit verdahtem muot vnd mit gesamenter hant, ze der zeit, do wir niht Chinde mit einander heten, vnd do wir iz wol getun mohten, verchauft haben vnserm Gruntherren dem erbern manne meister Chunraten von Lintze, des ze den Zeiten div chappelle was ze Sant Pangracien auf des Hertzogen hof ze Wienne, vnd der ouch ze den Zeiten des Herzogen Friedreichs von Oesterreich Schreiber was, ein halb pfunt wienner pfenning Geltes ze rechtem puorchreht auf vnserm Hous vnd der Hofstat in des Chraftes hof, vnd sein ouch von im aller der werung, der er vns darvmb schuldich was, gar reht vnd redleich gewert. Wir sullen ovch dazselbe halb pfunt dem vorgenanten maister Chunraten vnd seinen nachchomen, die divselben Chappellen danne habent, vnd ouch der Chappellen ze Sant Pangracien dienen dreistunt alle Jar in alle dem Reht, als man purchreht hie ze Vienne dient, an sant Jorgen tag viertzich pfenning, an sant Michelstag viertzich phenning vnd ze weichnahten viertzich pfenning, vnd swem dazselbe vnser Hovs vnd die hofstat nach vns wirt, der sol des vorgenanten Halb pfunt Geltes der vorgesprochen Chappellen, vnd swer da rehter Chapplan ist, gebunden sein ewichleich ze dienen mit allem dem Reht vnd in aller der weis, als wir iz verchouft haben und auch da vor geschriben stet. Ich Maister Chunrat von Lintze, Chapplan ze Sant Pangracien ze Wienne vnd Hertzog Friedreichs Schreiber ze O^esterreich, bekenne vnd vergich, Daz der vorgeschriben chouf geschehen ist reht vnd redleichen, als ez da vor geschrieben stet, vnd daz fu^erbaz dehainer slaht Chrieg daran werde vnd ewichleich staet beleibe, so han ich disen brief darvber haizzen schreiben vnd mit meinem vnd mit hern Helmweigs, des die vorgenant Chappelle vor was, Insigeln besigelt. Des sint gezeug derselbe her Helmweich, her Hainreich, her Gerhart, her Perchtram priester, her Chunrat der Witze, her Starchant der Schober, Dietreich von Nevnburch vnd ander wahrhafter laeut genu^och. Der prief ist gegeben ze Wienne, do von Christes gebvrt warn ergangen Drevtzehen Hundert Jar darnach in dem sibenten Jar, an Sant Mathias tag in der vasten.

Source Fulltext: HAUSWIRTH, Schotten (=FRA II/18, 1859) S. 124-125