Ich Heinrich der Fuendorfer vergich an diesem briefe vnd tuen chunt allen den, di disen brief lesent oder horent lesen, di nu lebent vnd hernach chvnftich sint, daz ich mit guetlichen willen vnd mit gvnst aller meiner geerben mein Lehen ze dem Engelgers, daz mein rechtes aigen gewesen ist, gegeben han dem Goteshause vnserr vrowen sant marien der Schotten ze Wienne mit sechzich phenningen geltes, di ich darauf gehabt han, also, daz die aigenschaft des vorgenanten guetes mit samt der gulte, di darauf ist, dem vorgenanten Goteshause furbaz ewichlichen beleiben sol. Daz han ich getan ze widerlegunge etliches schadens, den dazselbe Goteshaus emalen von mir enphangen hat. Vnd des vorgenanten Lehens dacz dem Engelgers suln scherm sein dem vorgenanten Goteshause die erbern herren her Rapot der Burkgraf von Gors vnd her Alber sein Sun, für alle ansprach nach des Landes reht. Vnd daz daz alles gantz, staet vnd vnzerbrochen beleibe, darvmbe gib ich vorgenanter Heinrich der Fu^eendorfer diesen brief dem vorgenannten Goteshause ze einem ewigem gezivge vnd ze einer bestetigunge diser sache versigelten mit der vorgenannten herren Insigel hern Rapotes von Gors vnd hern Albers seines Svnes, vnd sint auch des gezivge diselben zwen herren, her Hadmar von Svnnenperch, her Chraft sein Svn, Friderich der Schotten amman, Dietrich der amman von dem Hippleins vnd ander vrumer leut genuech. Diser brief ist gegeben, do von Christes geburt waren ergangen Tausent Jar Driv hundert jar vnd darnach in dem nevnten jare, des Svntages vor mittervasten.

Source Fulltext: HAUSWIRTH, Schotten (=FRA II/18, 1859) S. 128-129