Ich Herwort von den Hofen vnd fraw Agnes mein hausfraw veriehen offenlich vnd tun kunt allen den, die disen brief lesent, horent oder sehent, die nu lebent vnd hernach kunftig sint, daz wir einen akcher bestanden haben von dem erbern herren Abbt Niclasen von den Schotten ze Wienne von seiner sammunge, den sy vns auzgelazzen habent von einem lehen, das sy habent an dem Kueperg, vnd denselben akcher haben wir mit vnser chost gestifftet vnd gepawen ze einem weingarten, also, das wir paide denselben weingarten mit allem nutz genczlichen inne haben sulen ze vnser baider leibgeding, vnd danne nach vnser baider tode, so sol der vorgenant weingarten ledichlichen vnd an allen krieg wider angevallen den vorgenanten herren den Abbt vnd die samunge ze vnser frawen chloster der Schotten ze Wienne also, das ewichlichen vnser baider sel vnd auch eines Hermanes sel, des Jungen Schober vnd frawen Benditen seiner hausfrawen, vnd aller vnser vordern sel besunderlich vnd ewichlichen gedenkchen sullen die vorgenanten herren vnd all ir nachkomen. Vnd wanne wir das mit gutlichem willen vnd mit zeitigem Rat vnd auch mit willen vnd mit gvnst aller vnser geerben getan haben, so geb wir darüber disen brief ze einem sichtigen vrkunde vnd ze einer bestettigunge diser sache versigelten mit vnserm Insigel vnd mit des vorgenanten Hermanes Insigel, des Jungen Schober, vnd mit Dietreichs Insigel von Rewsezze vnd mit Berichtoldes Insigel von Haslern, die diser sache gezeuge sind mit Irn Insigeln. Diser brief ist geben, da von Christi gepurd waren ergangen drewczehen hundert Iare vnd darnach in dem zweliften Iare, an den Sunbenttage.

Source Fulltext: HAUSWIRTH, Schotten (=FRA II/18, 1859) S. 138