Ich Fridreich der Graf von Stocherawe vnd ich Otte sein prveder wir veriehen vnd tvn chvnt allen den, die disen prief lesent oder horent lesen, die nv lebent vnd hernach chvnftich sint, daz wir mit vnser erben gvtem willen vnd gvnst, mit verdachtem mvet vnd mit gesampter hant, zv der zeit, do wir iz wol getvn mochten, verchavft haben vnsers rechten aigens Sechzich wienner phenning geltes, die da ligent ze Hagenprvnne, mit allem dem nvtz vnd recht, als wir sie in aigens gewer herpracht haben, vmb fvnfdhalbe phvnt wienner phenning, der wir recht vnd redlichen gewert sein, dem Erbern Gotzhavs hintz sand Nyclas gegen Staemestorf fvrbaz ledichleichen vnd vreileichen ze haben vnd ewichleichen pei demselben Gotzhavs beleiben vnd allen seinen frvmen damit ze schaffen, als iz dem vorgenanten Gotzhavs ze Staemestorf wol chvm vnd fvege, an allen irresal vnd an allen Cbrieg. Vnd darvber dvrch pezzer sicherhait so setzzen wir vns, ich Fridreich der Graf von Stocherawe vnd ich Otte sein prveder, fvr vns vnd fvr alle vnser erben vber die vorgenanten Sechzich wienner phenning geltes, die da ligent ze Hagenprvnne, dem Erbern Gotzhavs datz sand Nyclas ze Staemestorf zv rechtem gewern vnd scherm fvr alle ansprach, als aigens recht ist vnd des landes recht ze Osterreich. Vnd wand mein prveder Otte nicht aigens Insigils hat, dovon so gib ich Fridreich der Graf von Stocherawe fvr mich vnd fvr In dem erbern Gotzhavs datz sand Nyclas ze Staemestorf disen prief zv ainem sichtigen vrchvnde vnd zv ainem offen gezevg vnd zv ainer ewigen vestnvnge diser sache versigilten mit meinem Insigil vnd mit des Erbern herren Insigil hern Nyclas des Pravzzels, der diser sache gezevg ist mit seinem Insigil. Vnd sint avch des gezevg her Jans, her Dietreich, her Wernhart die Pravzzel, Sweiker von Engelprechtzstorf, Dietmar vnd Dietreich sein aidem paidesampt, Alber der Edlinch, Gotfrid von Hagenprvnne, Dieme vnd Adelold von Staemestorf vnd ander frvm levte genvech, den dise sache wol chvnt ist. Diser prief ist geben ze Wienne, do von Christes gebvrt waren ergangen Drevzehen Hvndert Iar In dem zweliften Iare darnach, des naechsten Eritages vor sand Merteins tage.

Source Fulltext: HAUSWIRTH, Schotten (=FRA II/18, 1859) S. 139-140