Wir Niclas von gotes gnaden Apt vnd di Samenunge gemaine des goteshausse vnser vrowen sand Marien der Schotten ze Wienne veriehen vnd tun kunt allen den, di disen brief lesent, horent oder sehent, daz der erber man her Albrecht, ze den zeiten vnser verweser ze Gaunestorf, durch besunder lieb vnd andacht, die er zu vns vnd zv vnserr Kirchen ze Gaunestorf hat, nach vnserm Rat Im vnd allen seinen vordern vnd auch allen den, der almu^osen er ye enphangen hat, ein Seigerat hat gemachet mit einer ewigen mess, di er in derselben vnser Kirchen ze Gaunestorf gestifftet hat, vnd dartzue hat er von vns gechauffet zwelf schilling geltes vnd vierczich metzen waiczes gu^olte, der dacz Rueprechtestorf ein phunt gelegen ist, Sechs schilling dinstes vnd Sechtzich phenning malphenning. So sind ir gelegen dacz Wolfpaizzingen dreizzich phenning geltes vnd di viertzich metzen waiczes. Darnach ist ir gelegen ze drauchuelde drei schilling gu^olte. Vnd darvmbe hat er vns gegeben Sechtzich phunt pfenning wienner mo^onzze, der wir gar vnd gaenczlichen von Im verrichtet vnd gewert sein. Vnd diselben ewigen messe hat er also gestiftet, daz er zu den zwain Priestern, di Im do gewonlich ze haben sind, furbas den dritten Priester sol in siner kost haben vnd derselbe sol alletage ein mess singen oder sprechen auf der zwaier alter einem, sand Peters oder sand Oswaldes, di er auch paide von newen dingen darzue hat lassen machen vnd vor der einem er sein begrebnuss erwelt hat. Vnd darvmbe, daz er denselben dritten Priester, mit dem er die ewigen messe gestiftet hat, dester paz in seiner chost gehaben mege, darvmbe so hat er von vns di vorgenanten gu^olt darzue gechauffet, vnd di hab wir Im mit sambt den Holden gegeben vnd in geantwurtet, ze haben vntz an seinen tot, vnd danne nach seinem tode, ob wir danne di vorgenanten vnser Chirchen ze Gaunestorf selb Inne haben wolten, so sul wir es selbe laisten vnd volfu^ern in aller der weise, als davor geschriben ist. Ob das aber wer, das wir si furpaz hinlassen wolten, wem wir si danne liezzen, dem solt wir si mit demselben punde vnd mit so ausgenomener rede lassen, also ob wir si selbe Inne hieten, oder ob wir si hinliessen, daz dannach diselb ewig messe mit dem dritten Priester vnd auf der vorgenanten zwaier aelter einem, als davor geschriben ist, gaentzlichen vnd ewichlichen sol behalten werden. Vnd darvmbe, daz dise Sach vnd dicz Selgeraet in aller der mass, als da vor beleuchtet ist, baide von uns vnd von dem vorbenanten hern Albrechtten, vnserm verweser ze Gavnestorf, gaentzlichen behalten werde vnd unzebrochen beleibe, des geh wir baidenthalbe daruber disen brief ze einem sichtigen vrchund vnd ze einer ewigen bestaetigung diser Sach versigelten mit vnsern baiden Insigiln vnd auch mit des vorgenanten herrn Albrechts Insigel. Sein sind auch getzeuge di erbern leut, di hernach geschriben sind, das ist, der Lang Heinrich, der Wo^olfl von der Ygla, Wernhart der Straicher vnd Leubman sein pru^eder Pvrger von Wienne, Pitrolf vnser Amman ze Gaunestorf, Chvnrat der Zechmaister, Ott der Ziser vnd Heinrich sein Aidem vnd mit im alle di gemain ze Gaunestorf vnd ander frum lewt genuech, den dise Sache wol kunt vnd gewissen ist. Diser prief ist gegeben, do von Christes gepu^erd waren ergangen dreuzehen hundert Jar vnd darnach in dem Achtzehenden Jare, an vnser vrowen awent ze der Lichtmess.

Source Fulltext: HAUSWIRTH, Schotten (=FRA II/18, 1859) S. 160-161