Ich Gvndakcher von Werd vnd ich Chadold vnd Heinrich sein prueder vergehen vnd tvn chvnt allen den, die disen prief lesent, horent oder sehent, die nv lebent vnd hernach chvnftich sint, Daz der erber man Chvnrat von Eberstorf von vns gehabet hat ze rehtem lehen, als des Landes reht ist, ein lehen, daz gelegen ist datz nidern Velebrvnne, des fvnfzehen Gevchart akchers ist vberal, daz vnser rehtes aigen gewesen ist, vnd daz hat der vorgenant Chvnrat mit vnser aller guetem willen vnd gvnst vnder sich gestiftet acht Holden, die davon dienent alle Jare Dreizzich phenning an sant Gorgen tag vnd niht mere. Dieselben aigenschaft habe wir gegeben ze der zeit, do wir ez wol getvn mohten, vnuerscheidenlichen mit gesamter hant vnd mit aller vnserr Erben guetlichem willen vnd mit des vorgenanten Chvnrades gvnst dem Goteshavse vnser vrowen sant Marien der Schotten ze Wienne, ewichlich da ze beleiben, vnd ist daz geschenhen ze den zeiten, do der Erber herre Apt Nychlas gewesen ist, also beschaidenlich, daz si vnser vnd ouch vnser vordern Sele dester vleizzichlichen gedenchen mit irem gepet. Vnd ouch durch pesser sicherhait so setze wir vns, Ich Gvndakcher von Werd vnd ich Chadolt vnd Heinrich sein prueder, dem vorgenanten Goteshause, dem Apt vnd der Sammenvnge gemaine, ze rehtem Scherm fu^er vns vnd fu^er all vnser Erben, als aigens reht ist vnd des Landes in Osterich. Daz dise sache staet vnd vnzebrochen beleibe, darv^eber gib ich vorgenanter Gvndacher von Werd vnd Chadold vnd ouch Heinreich sein prueder disen prief ze einem offen vrchvnde vnd ze einem waren gezeuge diser sache versigilten mit vnsern Insigiln, vnd sint des gezeug her Hainreich von Haespach, Vlrich von Pirbatvm, Friderich sein prueder, Egelolf von Pirbavm, Ebran von Symanveld, Ebran vnd Friderich seu Sv^en, vnd Nychlas der Holtzschuech vnd ander frum leut genuech, den dise Sache wol gewizzen vnd chvnt ist. Diser prief ist gegeben ze Wienne, do von Christes gepurt waren ergangen dreutzehen hundert Iare vnd darnach in dem Sibentzehenten Iare, an sant Marx tage.

Source Fulltext: HAUSWIRTH, Schotten (=FRA II/18, 1859) S. 159-160