Stephanus, dei gratia prepositus ecclesie Nevburgensis, vniuersis ecclesiarum rectoribus per Pataviensem dyocesin constitutis salutem et sinceram in domino karitatem et mandatis apostolicis humiliter obedire. Noueritis, nos litteras sedis apostolice recepisse per omnia in hec uerba. (Folgt die pag. 168, Nr. CXLII abgedruckte Bulle des Papstes Johann XXII. ddo. Avignon 7. October 1318.) Volentes igitur mandatis apostolicis, prout decet, humiliter obedire, vobis omnibus et singulis et singulariter vniuersis auctoritate apostolica districte precipiendo mandamus, quatenus omnes tales ocultos detentores, vbi et quandocumque requisiti fueritis, trina amonicione premissa octo dierum spacium pro prima, octo pro secunda, octo pro tercia peremtoria vestris monitis inducatis, ut predicto monasterio satisfaciant, alioquin ipsos publice coram populo in ambone ecclesie vestre ex communicatos a sede apostolica publicetis, donec dicto abbati et suo conuentui satisfaciant, oculta reuelent et ablata restituant vniuersa. Datum in Nevburga anno domini M^o. CCC^o. vicesimo, feria sexta proxima infra octauam epiphanie domini. In cuius rei testimonium sigillum nostrum presentibus est apensum.

Source Fulltext: HAUSWIRTH, Schotten (=FRA II/18, 1859) S. 169