Wir Mauricius van gotes gnaden abt vnd dy samnung gemain des gotzhaus vnser vrown sand Marein vnd der Schotten ze Wienne wir veriechen vnd tun chunt alle den, dy dysen prief lesent oder horent lesent, dy nu lebent vnd hernach chunftich sint, das her Jacob van Chrut vnd vrow Katherei sein hausvrow mit verdachtem mut vnd mit alle irre erben gutem willen, mit zeitigem rat, da sev is wol getun machten, got ze ainem dyenst vnd durch irre baider sel hails willen gewidemt vnd geben habent der chappellen, dy da leit auserthalbe vnsers munster auf dem vreithof, dy sev gestift habent, Newn phunt wienner phenning gult also beschaidenlichen, funf phunt ze ainer ewigen messe, dy wir haben in derselben Chapellen alle Tag schullen, vnd ain phunt ze ainem Licht ze derleuchten dy vorgenant Chapellen, vnd drev phvnt, mit den wir iren Jartag ewichleichen alle Jar begen schullen. Vnd tet wir des nicht nach stet behielten, als var geschriben ist, so schullen sich ir nechstev vreunt derselben Neun phunt vnderwinden vnd schullen sev geben auf ain ander Chirchen oder goteshaus, da is als wol bestat sei vnd man is bege, als vargeschriben stet. Vnd das als das stet vnd vnzebrochen beleib, des geh wir Mauritius abt vnd dy samnung gemain der Schotten ze Wienne in dysen prief ze ainem waren Zeug vnd offen vrchund versigilten mit vnser Insigiln. Der prief ist geben nach Christes geburd vber Dreuzehen hundert jar in dem zwa vnd zwainzigisten Jar, an sand Gorgen Tag.

Source Fulltext: HAUSWIRTH, Schotten (=FRA II/18, 1859) S. 169-170