Ich Graf Berhtolt von Hardekke vergich vnd tuen chunt allen den, di disen prief lesent oder horent lesen, di nu lebent vnd hernach chunftich sint, Daz ich vollichlichen vnd gaentzlichen verrichtet vnd beweiset pin mit gueten priefen vnd mit endehafter bestaetigunge, di mir di erbern geistlichen herren, her Mauritz ze den zeiten apt vnd di Samenunge des Goteshausse vnserr Vrowen sant Marein der Schotten ze Wienne, gezaiget habent vnd di vor mir von wort ze wort gelesen sint, di si habent vber di Chirchen ze Pulka, an denselben priefen in di gnade geben vnd bestaetigt ist, daz si diselben Chirchen ze Pulka, so si in nu aller schierst ledich wirt, furbaz niht mer verleihen suln, si suln si halt danne furbaz mit allem nutz vnd mit allem reht zv irem Tische vnd zv irer phruende inne haben. Vnd wanne ich des endichlichen vnd mit gantzer warhait von den vorgenanten herren von den Schotten vnd mit iren priefen beweiset pin, davon so gelob ich in daz an disem priefe fur mich vnd fur alle mein nachchomen, wanne wir ir Vogt sein vber alles daz, daz si guetes habent ze Pulka vnd vberal in der Grafschaft, daz si furbaz an derselben Chirchen ze Pulka vnd an allem dem rehten, daz si daran habent, von mir noch von allen meinen nachchomen dehainen irresal haben suln vnd halt, daz wir in alles ir reht daran staet haben wellen vnd sev daran beschaermen, so wir aller peste mugen, vor aller maenichlichen, ich vnd alle mein nachchomen. Vnd gib ich vorgenanter Graf Berhtolt von Hardekke den vorgenanten herren von den Schotten ze Wienne vnd allen iren nachchomen darvber disen prief zv einer ewigen bestaetigunge vnd zu einer vestenunge diser sache versigelten mit meinem Insigel. Diser prief ist gegeben nach Christes gepurt Dreuzehen Hundert iar vnd darnach in dem fumf vnd zwaintzigstem Iare, des naehsten Suntages nach sant Georgentage.

Source Fulltext: HAUSWIRTH, Schotten (=FRA II/18, 1859) S. 175-176