Ich Margret hern Wernhardes witibe dez Truchsaetzen von Votzeinstorf, dem got genade, vnd ich Rudolf zv den zeiten Pharrer ze Newenburch Marchthalben, vnd ich Leb vnd ich Jans vnd ich Wernhart vnd ich Herbort ir sune, vnd ich Wilbirch vnd ich Elzbet ir tochter, wir veriehen vnd tun chunt allen den, die disen brief lesent oder horent lesen, die nu lebent vnd hernach chunftich sint, daz wir mit vnser erben gu^oten willen vndgu^enst, mit verdachtem mu^et vnd nach vnser freunde rat, zv der zeit, do wir iz wol getu^on mochten, verchauft haben vnsers rechten aigens Sechtzich vnd funf phunt wienner phenninge geltes, die da ligent ze Obern Greitzensteten auf vierdhalbem Lehen, mit allem dem nutz vnd recht, alz wir si in aigens gewer herpracht haben, Vmb fu^enf vnd Sechtzich phunt wienner phenninge, der wir recht vnd redleich gewert sein, Dem erbern herren apt Mauritzen datz den Schotten ze Wienne vnd dem Covent gemaine daselbens furbaz ledichleichen vnd vreileichen ze haben vnd allen irn frumen damit ze schaffen, verchauffcn, versetzen vnd geben, swem si wellen, an allen irresal. Vnd darvber zv ainer pezzern sicherhait so setzen wir vns, ich Margret hern Wernhartes witibe dez Trvchsaetzen von V^etzeinstorf vnd ich Ru^odolf zv den zeiten pharrer ze Newenburch Marchthalben, vnd ich Leb vnd ich Jans vnd ich Wernhart vnd ich Herbort ir svne, vnd ich Wilbirch vnd ich Elzbet ir to^echter, vnd ich Philip von Symoningen vnuerschaidenlich mitsampt allen vnsern erben vber die vorgesprochen Gulte apt Mauritzen datz den Schotten ze Wienne vnd dem Covent gemain daselbens zv rechtem gewer vnd scherm für alle ansprach, alz aigens recht ist vnd dez landes recht ze O^esterreich. Vnd wand dev vorgenant vro Margret nicht aigens Insigils hat vnd Herbort ir svne vnd Wilbirch vnd Elzbet ir to^echter noch zv ir iarn nicht chomen sint vnd auch noch nicht voitper sint vnd auch nicht aigener Insigil habent, davon so geben wir, ich vorgenanter Rudolf, vnd ich Leb, vnd ich Jans, vnd ich Wernhart, vnd ich Philip von Symoningen, fur vns vnd fvr sev, apt Mauritzen datz den Schotten vnd dem Covent gemaine daselbens, disen brief zv einem offen vrchunde vnd zv einem waren gezevge diser sach versigilten mit vnsern Insigiln vnd mit dez erbern herren Insigil Graf Chunrades von Schawenberch, der diser sach gezevge ist mit seinem Insigil. Diser brief ist geben ze Wienne nach Christes gebu^ert Drevzehen Hundert iar in dem Sechs vnd zwaintzgisten iar darnach, an dem achten tage vor sant Jo^erigen tage.

Source Fulltext: HAUSWIRTH, Schotten (=FRA II/18, 1859) S. 177-178