Ich Chadolt von Ekchehartzowe vnd ich Margret sein hovsvrowe wir veriehen vnd tvn chvnt allen den, die disen prief lesent oder horent lesen, di nv lebent vnd hernach chvnftich sint, Daz wir mit vnserr erben gvten willen vnd gvnst, mit verdachten mvte, ze der zeit, do wir ez wol getvn mochten, vnd levterlichen durch got vnser sel ze Troste recht vnd redelichen geben haben vnser aygenschafft, die wir gehabt haben avf der wiesen, die da leit ze Lachsendorf in dem wisemat pei der hvrben, dem erbern goteshovse ovf vnser vrowen alter ze den Schotten ze Wienne mit allem dem recht, als wir sic herpracht haben vnd aygenschaft recht ist, also daz Peter hern Wisentes svn des Chramer, der dieselben wisen chovft hat, vnd sein erben furbaz alle iar von derselben wisen diennen schvllen vier wienner phenninge purchrechts ze rechtem purchrechte ovf den vorgenanten alter vnser vrowen, oder swer die egenanten wisen nach im besitzet, mit allem dem rechte, als Purchrechtes recht ist, an sand Georgen Tage vnd des landes recht ze Osterrich. Vnd geben des disen prief dem vorgenanten Goteshovse ze offem gezevge vnd ze ainer ewigen vestnunge diser sache versigilten mit vnserm Insigel. Der prief ist geben ze Wienne nach Christes geburt drevtzehenhundert iar darnach in dem Sechs vnd zwaintzigistem iare, des Svntages vor phingisten.

Source Fulltext: HAUSWIRTH, Schotten (=FRA II/18, 1859) S. 178-179